खजुरा (बाँके) : राष्ट्रपति रनिङशिल्ड अन्तर्गत खजुरामा हुने छैटौं अन्तर विद्यालय मेयर रनिङशिल्ड प्रतियोगिताको तयारी पुरा भएको छ । खजुरा गाउँ पालिकाले शनिवार पत्रकार सम्मेलन गर्दै प्रतियोगिताको सम्पूर्ण तयारी पुरा भएको जनाएको हो ।
खजुरा २ स्थित शुक्र भलिवल रङ्गशालामा आयोजना हुने अन्तर विद्यालय मेयर रनिङ शिल्डको आइतबार प्रतिनिधिसभा सदस्य किशोसिंह राठोरले गर्नेछन् । प्रतियोगितामा खजुरा गाउँपालिका अन्तर्गतका १०३ बिद्यालयबाट १ हजार ३०४ विद्यार्थीहरुले सहभागिता जनाउने पत्रकार सम्मेलनमा जानकारी गराइएको छ ।
प्रतियोगितामा माध्यामिक तह (कक्षा ९–१२) अन्तर्गत १५ वटा खेल खेलाइनेछ भने आधारभुत तह (कक्षा ६–८) तहमा १० खेल खेलाईने छ । त्यसैगरि आधारभुत तहको कक्षा १ देख ५ कक्षा अन्तर्गत ३ खेल खेलाइने पत्रकार सम्मेलनमा बितरित बिज्ञप्तिमा उल्लेख छ ।
प्रतियोगितामा माध्यामिक तहमा एथलेटिक्स, भलिवल र कबड्डी गरि ३० इभेन्ट, आधारभुत तर्फ १० इभेन्ट र प्राथमिक तर्फ ६ वटा एथलेटिक्स इभेन्टमा प्रतिस्पर्धा गराइने छ । प्रतियोगितामा प्रथम हुने विद्यालयले ३३ हजार नगद र प्रमाणपत्र, दोस्रो हुनेले २० हजार नगद सहित प्रमाणपत्र र तेस्रो हुने विद्यालयले १४ हजार नगद सहित प्रमाणपत्र पाउने छन् । भलिबल, कबड्डी र एथलेटिक्स तर्फ उत्कृष्ट छात्र छात्रालाई जनही ५ हजार १ सय पुरस्कार र प्रमाणपत्र दिइने आयोजकले जनाएको छ ।
मेयर रनिङशिल्ड छनौट प्रतियोगिता भएकाले प्रतियोगितामा उत्कृष्ट खेल प्रदर्शन गर्ने खेलाडीलाई राष्ट्रपति रनिङशिल्डको जिल्ला र प्रदेशको छनौट खेलमा पठाइने विज्ञप्तिमा उल्लेख छ ।
पत्रकार सम्मेलनमा बोल्दै खजुरा गाउँपालिकाका अध्यक्ष डम्बर विक तुफानले आगामी वर्षदेखि खजुरा क्षेत्रबाट राष्ट्रिय तथा अन्तराष्ट्रिय खेलमा सहभागी खेलाडीहरुको नाममा पुरस्कार घोषणा गरिने प्रतिबद्धता जनाए । उनले मेयर रनिङशिल्डलाई पालिकाले १३ लाख बढी बजेट बिनियोजन गरेको जानकारी दिँदै १५ लाख ५३ हजारको लागतमा प्रतियोगिता सम्पन्न हुने जनाए । खजुराको गिजरा क्षेत्रमा पाइने निलगाईलाई प्रतियोगिताको मस्कटकोरुपमा बिम्बित गरिएको उनले बताए । प्रतियोगिताको ब्यवस्थापकिय जिम्मेवारी जनता नमुना माबिलाई दिइएको अध्यक्ष बिकले बताए ।
प्रतियोगिता सम्पन्न गर्नका लागि बिभिन्न उपसमिति गठन गरिएको र सम्पूर्ण समितिहरुले आ–आफ्नो कामको तयारी पुरा गरेको सचिवालय संयोजक माधव शर्माले बताए । भोलि १ बजेबाट सुरु हुने प्रतियोगिता १० गते सम्म चल्ने छ । खजुरा गाउँपालिकाले प्रतियोगिता अवधिभर विद्यालयका पठनपाठन स्थगित गरि विद्यार्थीहरुलाई प्रतियोगितामा पठाउन सूचना जारी गरेको छ ।
