नेपालगञ्ज : गत केही दिन यता सुरु भएको हुस्सु र कुहिरोसँगै बिहान बेलुका चल्ने शीतलहरले नेपालगञ्जमा अत्यधिक चिसो बढेको छ । चिसो बढेसँगै यहाँको जनजीवन कष्टकर बन्दै गएको छ ।
जल तथा मौसम कार्यालय नेपालगञ्जका नायब मौसम विज्ञान सहायक कुमार रानाका अनुसार बुधबार बिहान नेपालगञ्जको न्यूनतम तापक्रम ७.८ डिग्री सेल्सियस र अधिकतम तापक्रम २१ डिग्री सेल्सियस थियो ।
मौसमविज्ञान सहायक रानाका अनुसार यसअघि मङ्गलबार नेपालगञ्जको तापक्रम झनै घटेको थियो । मङ्गलबार बिहान नेपालगञ्जको न्यूनतम तापक्रम ६.५ डिग्री सेल्सियस र अधिकतम तापक्रम १८.५ डिग्री सेल्सियस थियो ।
उनले अब केही दिनसम्म यहाँको मौसम यस्तै रहने जनाउँदै अलिअलि तलमाथि मात्रै हुने बताए । केही दिन यता नेपालगञ्जमा राम्ररी घाम लाग्न पाएको छैन । दिउँसो केही छिन मात्र घाम देखिन्छ भने कुनै कुनै दिन दिनभरि नै हुस्सु र कुहिरोले ढाक्ने गरेको छ ।
चिसो बढ्दै जान थालेपछि यहाँको जनजीवन कष्टकर बन्दै गएको छ । चिसोबाट बालबालिका, ज्येष्ठ नागरिकलगायत दैनिक ज्याला मजदुरी गर्नेहरु सबैभन्दा प्रभावित भएका छन् ।
चिसोकै कारण नेपालगञ्ज बजार सुनसान हुन थालेको छ । दिउँसो र अपराह्न मात्रै बजारमा केही चहलपहल देखिन्छ भने अन्य समयमा बजार सुनसान नै रहने गरेको नेपालगञ्ज उद्योग वाणिज्य सङ्घले जनाएको छ ।
