नेपालगञ्ज : बाँकेको नौवस्तास्थित बाल सुधार गृहबाट फरार रहेका मध्ये एक जना (बालबिज्याईकर्ता) सम्पर्कमा आएका छन् । इलाका प्रहरी कार्यालय कोहलपुरका प्रहरी नायव उपरीक्षक सुन्दर तिवारीका अनुसार अझै १४ जना भने सम्पर्कविहीन नै छन् ।
उनीहरूको खोजी कार्य भइरहेको प्रहरीले जनाएको छ । मङ्गलबार पनि सुरक्षा व्यवस्था प्रभावकारी बनाइएको र सुधार गृहको अवस्था सामान्य रहेको डिएसपी तिवारीले बताए । यसअघि नेपालगञ्ज र अन्य बाल सुधारगृहबाट तनाव सिर्जना भएपछि फरार रहेका अधिकांश आफैँ सम्पर्कमा आएकाले नौवस्ताबाट फरार भएकाहरू पनि गृहमै फिर्ता हुने प्रहरीको अनुमान छ ।
बाल सुधार गृहमा १८ वर्षभन्दा कम उमेरकालाई मात्रै राख्नुपर्नेमा १८ वर्ष उमेर पुरा भइसकेकाहरू समेत रहेकाले आपसी विवाद बढेको हो । नौवस्ता बाल सुधार गृहमा चलेको आपसी विवाद सुरक्षा सहित वार्तामा सोमबार राती समाधान भएको बाँकेका प्रमुख जिल्ला अधिकारी श्रवण कुमार पोखरेलले जानकारी दिए ।
प्रमुख जिल्ला अधिकारी पोखरेलले भने, “वार्ताको गरी उनीहरूको जायज माग पुरा गर्ने सहमति भएको छ, थप सुरक्षा कारबाही पनि गर्नुपरेको छ । उनीहरूले राखेको सफा पानी, उपचार प्रबन्ध, शिक्षा, सीप विकास, मनोरञ्जन जस्ता विषयमा समन्वय र सहजीकरण गरी समाधान खोजिने मौखिक सहमति भएको छ ।“
नौवस्तामा एक सय १६ बालबिज्याईकर्ता छन् । यसअघि बाँकेको हिरमिनियामा रहेको बाल सुधार गृहमा आपसी झडपमा एक जना बालबिज्याईकर्ताको निधन समेत भएको थियो ।
