नेपालगञ्ज : २०औं राष्ट्रिय महिला स्वास्थ्य स्वयंसेविका दिवसका अवसरमा नेपालगञ्जमा २३ जना महिला स्वास्थ्य स्वयंसेविका सम्मानित हुनुको साथै १० जना उमेर हदका कारण बिदाई भएका छन् ।
नेपालगञ्ज उपमहानगरपालिकाले महिला स्वास्थ्य स्वयंसेविकालाई दिवशका अवसरमा सम्मान गरेको हो । नगर प्रमुख प्रशान्त विष्ट र प्रमुख प्रशासकीय अधिकृत ओमबहादुर खड्काले महिला स्वास्थ्य स्वयंसेविकालाई सम्मान र विदाई गरेका थिए ।
महिला स्वास्थ्य स्वयंसेविकालाई प्रोत्साहन गर्न हरेक वर्ष सम्मान गर्दै आएको नेपालगञ्ज उपमहानगरपालिका स्वास्थ्य महाशाखा प्रमुख रामबहादुर चन्दले बताए । सोही अनुरुप २३ वटै वडाका स्वयंसेविकालाई सम्मान गरिएको हो ।
नेपालगञ्ज उपमहानगरपालिकाले आजै उमेर हद पूरा भएका १० जना महिला स्वास्थ्य स्वयंसेविकालाई विदाई गरेको छ । ६० वर्ष उमेर पुगेकालाई विदाई गरिएको हो । विदाई हुने स्वयंसेविकालाई जनही ५० हजार रुपैयाँ दिने गरिएको छ । नेपालगञ्ज उपमहानगरपालिकाका २३ वडामा १५६ जना महिला स्वास्थ्य स्वयंसेविका कार्यरत छन् ।
नेपालगञ्ज उपमहानगरपालिकाले महिला स्वास्थ्य स्वयंसेविकालाई संचार खर्च वार्षिक जनही १ हजार २ सय रुपैयाँ, चाडपर्व खर्च वार्षिक जनही २ हजार ५सय र दिवस मनाउने खर्च दिने गरेको छ । यस्तै संघ सरकारले महिला स्वास्थ्य स्वयंसेविकालाई लुगा भत्ता वार्षिक जनही रु. १० हजार, यातायात खर्च १२ हजार र वार्षिक समीक्षा खर्च दिने गरेको छ ।
दिवसका अवसरमा आयोजित कार्यक्रममा बोल्दै नगर प्रमुख विष्टले महिला स्वास्थ्य स्वयंसेविका विना स्वास्थ्य क्षेत्रमा अपेक्षित सम्भव नहुने बताए । विष्टले महिला स्वास्थ्य स्वयंसेविकाको लगावले स्वास्थ्य क्षेत्रले फड्को मारेको दाबी गरे । उनले राज्यले दिने गरेको सेवा सुविधा नगण्य रहेको भन्दै नेपालगञ्ज उपमहानगरपालिकाले महिला स्वास्थ्य स्वयंसेविकाको सेवा सुविधा बढाउन प्रतिबद्ध रहेको उल्लेख गरे ।
कार्यक्रममा प्रमुख प्रशासकीय अधिकृत खड्का, स्वास्थ्य कार्यालय बाँकेकी प्रमुख सुनिता पौडेल, नेपालगञ्ज उपमहानगरपालिका स्वास्थ्य महाशाखा प्रमुख चन्द, वडा नम्बर १५ पिप्रहवा स्वास्थ्य केन्द्र प्रमुख जयराम पाण्डे, विदाई भएकी महिला स्वास्थ्य स्वयंसेविका तुलसा थापालगायतले भनाई राखेका थिए ।
कार्यक्रम अघि नगरमा प्रभातफेरि गरिएको थियो । महिला स्वास्थ्य स्वयंसेविका संघ नेपालगञ्ज उपमहानगरपालिकाकी कार्यबहाक अध्यक्ष ज्योति श्रेष्ठको अध्यक्षतामा कार्यक्रम सम्पन्न भएको थियो । कार्यक्रमको सञ्चालन सुष्मा चौधरीले गरेकी थिईन ।
