कोहलपुर (बाँके) : बाँकेको कोहलपुर नगरपालिकाले शैक्षिक संस्थाहरुलाई दर्ता गर्न आग्रह गरेको छ । व्रिज कोर्ष, तालिम केन्द्र ट्यूसन कोचिङ्ग, विदेशी भाषा कक्षा जस्ता विद्यालय बाहिर हुने शैक्षिक परामर्श सेवाहरु नगरपालिकामा दर्ता गरी सञ्चालन गर्न सूचना नै जारी गरेको छ ।
पालिकाका शिक्षा तथा यूवा खेलकुदका अधिकृत रवि मिजारले कोहलपुरमा सञ्चालन भएका शैक्षिक संस्थाहरुलाएई दर्ता गर्न आग्रह गरिएको बताए । नगरपालिकाको कार्यविधि अनुसार पालिकामा तोकिएको मितिमा दर्ता नभए कारवाहीको प्रक्रिया अगाडि बढाइने पनि उनको भनाइ छ। कोहलपुर नगरपालिकामा विगत लामोसमय देखि शैक्षिक संस्थाहरु विना दर्ता सञ्चालन रहेको पाइएको थियो ।
शैक्षिक संस्थाहरुले मनपरी रुपमा ‘फि’ लिएको र आफूखुसी सञ्चालन भएको पाइएको छ उनले भने–यहाँसम्मकी कतिपय शैक्षिक संस्थाहरु पालिकामा छन्, भन्ने सम्मको नगरपालिकासँग जानकारी छैन । त्यसैले तथ्य तथ्यांकका लागि पनि दर्ता गर्न अनिवार्य गरिएको हो । कोहलपुर क्षेत्रभित्रका शैक्षिक संस्थाहरुलाई दर्ता प्रक्रियामा लिन २०७६ पुष २८ गते नगरपालिकाले शिक्षा ऐन पारित गरेको थियो ।
अनुमति तथा नियमन सम्बन्धी कार्यविधि २०८० को अनुसूची १ बमोजिम निवेदन दिने व्यवस्था रहेको प्रमुख प्रशासकीय अधिकृत धोलकराज ढकालले जानकारी दिए । दर्ता पक्रियामा नजाने अथवा अटेरी गर्ने शैक्षिक संस्थाहरुलाई बन्द गर्ने उद्देश्यका साथ अगाडि बढेको प्रमुख प्रशासकीय अधिकृत ढकालले जानकारी दिए ।
कोहलपुरको शैक्षिक संस्थाहरुलाई व्यवस्थापन गर्न पनि उनीहरुलाई दर्ता प्रक्रियामा कडाइ गरिएको नगर प्रमुख पूर्ण प्रसाद आचार्यको भनाइ छ । कोहलपुर नगरपालिकाले शिक्षामा प्राथमिकता दिएर काम गर्दै आएको छ ।
