कोहलपुर (बाँके) : देउँसी भैलो कार्यक्रमबाट उठेको रकम कोहलपुरका मृगौला पीडितलाई हस्तान्तरण गरिएको छ । सगरमाथा डान्स एण्ड इन्टरटेन्मेन्ट खजुरा र दश बिगाह युवा जागरण क्लबले संयुक्तरुपमा आयोजना गरेको भैलीबाट उठेको ४८ हजार रुपैयाँ सामाजिक उत्तरदायित्व वहन गर्दै कोहलपुर १० कालिकानगरका मृगौला पीडित प्रकाश विकलाई हस्तान्तरण गरिएको हो ।
सगरमाथा डान्स एण्ड इन्टरटेन्मेन्ट खजुरा र दश बिगाह युवा जागरण क्लबले सोमवार आयोजित एक कार्यक्रममा उक्त रकम हस्तान्तरण गरेको दश बिगाह युवा जागरण क्लबका उपाध्यक्ष दिपेन्द्र कुँवरले जानकारी दिए ।
कार्यक्रममा सगरमाथा डान्स एण्ड इन्टरटेन्मेन्ट खजुराका अध्यक्ष दिलु सुनार र दश बिगाह युवा जागरण क्लबका अध्यक्ष सुरेश अधिकारीले भैलो खेलेर अन्य फजुल खर्च गर्नुको साटो सामाजिक तथा मानवीय विषयमा सहयोग गर्न पाउँदा आफुहरुलाई आत्मसन्तुष्टि मिलेको बताउँदै युवाहरुले सामाजिक सरोकारका विषयमा आवाजसहित विकास निर्माण र मानवीय सेवामा समर्पित हुनुपर्नेमा जोड दिए ।
पीडितको घरमै पुगेर उपचारका लागि रकम हस्तान्तरण गरेपछि खुशी ब्यक्त गर्दै मृगौला पीडित विकले यो सहयोगले आफुले साक्षात भगवान पाएको महशुस गरेको बताए ।
