नेपालगञ्ज : नेपालगञ्जको त्रिभुवनचोकमा यतिबेला भीडभाड छ । तिहार नजिकिँदै जाँदा सडकमा पसल राखिएपछि त्रिभुवनचोकदेखि त्रिवेणीमोडसम्म भीडभाड बढेको हो ।
हिन्दुको ठूलो चाडमा बर्सेनि यो सकडमा पसल राख्ने गरिन्छ । चाडमा बीच सडकमा पसल राख्नु परम्परा जस्तै भइसकेको छ । धेरै पहिलादेखि चाडबाडमा यहाँ पसल लगाउँदै आइएको छ ।
केही पहिला उपमहानगरपालिकाले रोक्न खोजेपनि परम्पराको रूपमा व्याख्या गरेर व्यापारीले विरोध गरेपछि पसल राख्न दिइएको थियो ।
यतिबेला यो सडकमा घुइँचो छ । तिहारका हरेक सामान राखिएको छ । व्यापारीले भने यसपाली धेरै कारोबार नभएको बताइरहेका छन् । पसले ताम्बा लखेरले यसपाली धेरै कारोबार नभइरहेको बताए ।
सकडको बीचमा पसल राखिएपछि त्यहाँ चार पांग्रे सवारीलाई भित्र छिर्न दिइएको छैन । ट्राफिक र नगर प्रहरीले त्यसको व्यवस्थापन गरिरहेका छन् । यो सडकमा पसल राख्ने बित्तिकै कुनै चाड परेछ भन्ने बुझिन्छ ।
यहाँ यतिबेला फूल किलोको दुई सयदेखि दुई सय पचास रुपैयाँमा कारोबार भइरहेको छ ।
