नेपालगञ्ज : कसौधन वैश्य समाज बाँकेका पूर्ब अध्यक्ष तथा व्यवसायी नन्दलाल वैश्यले भेरी अस्पतालमा उपचार गराइरहेका घाइते र कुरुवालाई ३१ थान कम्बल र ३१ वटा तन्ना वितरण गरेका छन् ।
कम्बल र तन्ना वितरणका लागि वैश्यले बाँकेका प्रमुख जिल्ला अधिकारी श्रवणकुमार पोखरेललाई हस्तान्तरण गरे । जाजरकोट र रुकुमपश्चिममा आएको भूकम्पमा परी घाइते भइ भेरी अस्पतालमा उपचाररत बिरामी र कुरुवालाई सहजता मिलोस् भनी सो कम्बल र तन्ना हस्तान्तरण गरिएको नेपालगञ्ज उद्योग वाणिज्य संघका पूर्व अध्यक्ष समेत रहेका वैश्यले बताए ।
उनले यो दुःखद घडिमा सबैले मिलेर एकअर्काको सहयोग गर्नु प्रमुख धर्म भएको बताउँदै आवश्यक परे अरु पनि सहयोग गरिने जानकारी दिए । सोही प्रकारले अस्पतालमा रहेका घाइते र कुरुवालाई उनले आइतवार चिया विस्कुट र केरालगायत गरेर विहानको नास्ता पनि खुवाएका थिए ।
कम्बल र तन्ना लिंदै बाँकेका प्रमुख जिल्ला अधिकारी पोखरेलले सबैको सहयोग र समर्थन र दौडधुपले गर्दा घाइतेको उपचार समयमै गर्न सकिएको जनाउँदै भुकम्पपीडितको उपचार र अन्य सहयोगका लागि बाँकेवासीले देखाएको आत्मियता सह्रानीय रहेको बताए ।
उनले सुरक्षा निकाय, चिकित्सक, स्वास्थ्यकर्मी, समाजसेवी, पत्रकार र अन्य नागरिकले दिएको सहयोग र हौसलाकै कारण यहाँ आएका सबै घाइतेको राम्रो उपचार हुँदा सबै सकुशल र खतरामुक्त रहेको बताए ।
