दाङ : दाङमा श्रीमतीको हत्यापछि फरार रहेका श्रीमान पक्राउ परेका छन् । घोराही उपमहानगरपालिका–१२ रतनपुरमा मलको खाल्डोमा गाडिएको अवस्थामा भेटिएकी ४० वर्षीया शारदा केसीको हत्या आरोपमा उनका ४१ वर्षीय श्रीमान मेघराज पक्राउ परेका हुन् ।
उनलाई शुक्रबार राति घोराही ३ गोग्लीबाट पक्राउ गरेको जिल्ला प्रहरी कार्यालय दाङले जानकारी दिएको छ । प्रारम्भिक अनुसन्धान अनुसार घटना मेघराजले घटाएको प्रहरीले बताएको छ ।
वैशाख १ गते राति साढे ९ बजे काठको दाउराले हानेर शारदाको हत्या गरेको मेघराजले प्रहरीसमक्ष बताएका छन् । घटनाको थप अनुसन्धान भैरहेको र आइतबार पत्रकार सम्मेलन गरी जानकारी दिने तयारी समेत गरेको प्रहरीले जानकारी दिएको छ ।
