नेपालगञ्ज : नेपाली संस्कृति र विकासको क्षेत्रमा नेपाल–भारत बीचको सहकार्य उदाहरणीय रहेको भन्दै त्यसलाई अझ बलियो पार्न सनातन धर्म संस्कृतिको संरक्षण जरुरी रहेको एक कार्यक्रमका सहभागीले बताएका छ्न् ।
उनीहरुले सनातन धर्म संस्कृतिले मात्र देशको राष्ट्रियता जोगिने बताए । राष्ट्रिय एकता अभियानले बुधवार नेपालगञ्जमा गरेको नेपाली संस्कृति र विकास क्षेत्र नेपाल–भारत सहकार्य विषयक विचार गोष्ठिमा बोल्ने सहभागीले सो कुरा बताएका हुन् । उनीहरुले धर्म संस्कृतिको सवाल होस् वा ठूला र मध्यवर्ती परियोजनानै किन नहोस्, व्यापार र पारवहनको क्षेत्रमा पनि नेपाल– भारत दुबै देशबीच सहयोग आदानप्रदान भैरहेको पनि स्मरण गरेका थिए ।
गोष्ठीमा बोल्दै पूर्व मन्त्री सर्वदेब ओझाले सनातन धर्म संस्कृति र परम्पराको जगेर्ना अहिलेको आवश्यकता रहेको उल्लेख गरे । उनले नेपाली संस्कृति र विकासको क्षेत्रमा नेपाल–भारत बीचको सम्बन्ध सदियौं वर्ष पुरानो रहेकाले यसको निरन्तरता अहिले पनि कायमै रहेको बताए ।
उनले धर्म संस्कृतिको नाममा हुने राजनीतिले द्वन्द्व निम्त्याउने खतरा उच्च हुने उल्लेख गरेका छन् । यस्तै नेपाली काँग्रेस बाँकेका उपसभापति गोपाल अधिकारीले देशको धर्म संस्कृति र राष्ट्रियता माटोसँग जोडिएको धारणा व्यक्त गरे । उनले नेपाल र भारतबीचको सम्बन्ध सदियौं वर्ष पुरानो भएको स्मरण गरे ।
नेपाल– भारतबीच धार्मिक, सांस्कृतिक तथा व्यापारीक हिसाबले अत्यन्त सकारात्मक सम्बन्ध रहेको अधिकारीको भनाइ छ । उनले दुबै देश सार्बभौमसत्ता भएकोले कसैले कसैको दबाब स्वीकार्य सम्भव नभएको उल्लेख गरे । यस्तै अन्तरास्ट्रिय संस्कृतिका महासचिव हर्क स्वाँरले नेपाल र भारतबीचको सम्बन्ध सांस्कृतिकरुपमा बलियो भएको भन्दै यसलाई निरन्तरता दिनुपर्ने बताए ।
उनले धर्मको नाममा भैरहेको राजनीतिले स्वाभिमान गुम्दै गएको टिप्पणी गरे । उनले धर्म र राष्ट्रियताला सवालमा गरिने राजनीतिले देश कमजोर हुने उल्लेख गरे । उनले सनातन धर्म संस्कृतिको संरक्षणले मात्र देशको राष्ट्रियता जोगिने जिकिर गरे ।
यस्तै राष्ट्रिय एकता अभियानका केन्द्रिय अध्यक्ष बिनय यादवले संस्कृतिको संरक्षणले मात्र राष्ट्रियता बलियो हुने बताए । उनले नेपालको सनातन संस्कृति पछिल्लो अवस्थामा कमजोर हुंदै गएका कारण अहिले नेपालको राष्ट्रियता कमजोर बन्दै गएको टिप्पणी गरे । उनले भारत र नेपालको संस्कृति र परम्परा उस्तै–उस्तै भएकाले त्यसको संरक्षणका लागि दुबै देशबीचको समन्वय र सहकार्य जरुरी रहेको बताए ।
छिमेकी देशहरुसँगको सुमधुर र मैत्रीपूर्ण सम्बन्धलाई विकास र प्रबर्द्धन गर्न आवश्यक रहेको उनको भनाइ छ । गोष्ठीमा संबिधान सभा सदस्य सन्ध्या देव, नेपाली काँग्रेसका लुम्बिनी प्रदेश सदस्य कृष्णा सापकोटा, नेपाल प्रेस युनियन लुम्बिनी प्रदेश समितिका महासचिव नवीन गिरी, संचारकर्मी, बुद्धिजीवी, विभिन्न कलेजका बिद्यार्थीगरि एक सय जना भन्दा बढीको सहभागीता रहेको थियो । भरत बिश्वकर्माको अध्यक्षतामा भएको विचार गोष्ठीको संचालन चक्र रावतले गरेका थिए ।
