नेपालगञ्ज : बाँकेको डुडुवामा रहेको जयेन्दु बाल सुधार गृहबाट भागेका चारै जना पक्राउ परेका छन् । पुष १४ गते बाल सुधार गृहबाट भागेका सुर्खेतका धर्म थापा, कैलालीका कृष्ण नगरकोटी, बुटवलका पुरन चौधरी र अविनाश पुनलाई प्रहरले प्युठानबाट पक्राउ गरेको हो ।
बाँकेका प्रहरी प्रमुख एसपी सन्तोष राठौरले बाल सुधार गृहबाट भागेका चारै जनालाई प्युठानबाट पक्राउ गरी बाँके ल्याइएको जानकारी दिए ।
बाल सुधार गृहमा २ सय ३२ जना थिए । त्यसमध्ये चार जना फरार भएका थिए । फरारमध्ये तीन जना जबरजस्ती करणी र एक जना कर्तब्य ज्यान मुद्दाका अभियुक्त हुन् । अपराध गरेका बालकलाई उक्त बाल सुधार गृहमा राख्ने गरिएको छ ।
