नेपालगञ्ज : नयाँ वर्ष २०८२ को पूर्व सन्ध्यामा नेपाली बजारमा सुनको मूल्यले प्रतितोला १ लाख ८६ हजार पुगेर नयाँ रेकर्ड कायम भएको छ । गत शुक्रबारको तुलनामा आतइबार प्रतितोला १ हजार रुपैयाँले बढेको हो ।
पछिल्लो समयमा अमेरिकाले लिएको व्यापार नीति, रूस–युक्रेन युद्ध, अमेरिका र चीनको बीचको तनावका कारण विश्वका लगानीकर्ताले सुनमा लगानी गर्न थालेको हुन् । अन्तर्राष्ट्रिय बजारमा देखिएको व्यापारको उचारचढाव घरेलु बजारमा पनि देखिएको हो ।
‘एउटा कारण भूराजनीतिक तनाव नै हो । युक्रेन–रूसबीचको युद्ध र इजरायल–हमास युद्ध । दोस्रो कारण अमेरिकी राष्ट्रपति डनल्ड ट्रम्पले चुनावी घोषणापत्रमा तीन वटा कुरालाई प्राथमिकता दिएका थिए– डलरलाई रिजर्भ करेन्सीमा विकास गर्ने, आर्थिक क्षेत्र सुधार गर्ने र युद्धविराम गर्ने ।
त्यसो हुँदा त्यति बेला सुनको मूल्य घटेको थियो । तर अहिले फेरि बढ्यो किनकि उनले भने बमोजिम भएन । कर नीतिमा फेरबदल हुँदा आर्थिक क्षेत्रमा ठूलो हलचल भयो’–नेपाल सुनचाँदी व्यवसायी महासंघका पूर्वअध्यक्ष तेजरत्न शाक्यले बताए ।
डलर कमजोर हुँदा मानिसहरूले सुरक्षित लगानीका लागि धमाधम सुन किनेकाले पनि सुनको मूल्य बढेको उनको तर्क छ ।
सामान्यतया नेपाली बजारमा दैनिक २० केजी सुन खपत हुने गरेको भए पनि अहिले दैनिक ७ केजी पनि हुन सकिरहेको छैन । मूल्य बढी हुँदा बजार चालयमान हुन नसकेको व्यवसायीहरूको भनाइ छ ।
आइतबार चाँदीको मूल्य पनि उकालो लागेको छ । गत शुक्रबार प्रतितोला १ हजार ९ सय ५ रुपैयाँमा कारोबार भएको चाँदीको मूल्य आइतबार ५५ रुपैयाँ बढेर १ हजार ९ सय ६० रुपैयाँ पुगेको छ ।
