नेपालगञ्ज : नेपालगञ्ज नाकामा रहेको हेल्थडेस्कका १९ जना कर्मचारी कामविहीन भएका छन् । माथिल्लो निकायले स्पष्ट निर्देशन नदिँदा नाकाको हेल्थ डेस्कमा खटिएका कर्मचारी तीन महिनादेखि कामविहीन भएका हुन् ।
सरकारले कोरोना, मलेरिया र टिबी जाँच गर्नका लागि नेपालगञ्जको नाकामा रहेको जमुनाहामा २०७७ चैत्र १२ गते हेल्थ डेस्क सञ्चालन गरेको थियो । दुई दिनपछि १४ गते कोरोनाका विरामी फेला परेका थिए ।
त्यसयता एक लाख दश हजारको जाँच गर्दा एक हजार ६ सय ५२ जना कोरोना संक्रमित फेला परेका छन् । १८ हजारलाई जाँच गर्दा ३ जनामा मलेरिया र १ हजार ६ सय जनाको जाँच गर्दा १३ जनामा टिबी फेला परेको हेल्थ डेस्कका ल्याब टेक्निसियन चिरञ्जीवी ज्ञवालीले जानकारी दिए ।
असोजदेखि हेल्थ डेस्कमा कुनै जाँच भइरहेको छैन । कर्मचारीहरु आउने र बसेर जाने गरिरहेका छन् । कोरोना संक्रमण कम भएकाले सरकारले परीक्षणमा त्यति ध्यान नदिएको सम्बद्धहरु बताउँछन् ।
विशेष गरी उक्त हेल्थ डेस्क भारतबाट काम गरेर फर्किएका नेपालीलाई जाँच्नका लागि सञ्चालनमा ल्याइएको थियो ।
