नेपालगञ्ज : अविरल वर्षाका कारण दाङमा चार हजार बढी घरपरिवार प्रभावित भएका छन् । जिल्लामा असोज १८ गते बेलुकादेखि असोज २५ गतेसम्म परेको अविरल वर्षातका कारण चार हजार सात सय ४४ परिवार प्रभावित भएको जिल्ला आपत्कालीन कार्य सञ्चालन केन्द्र दाङले जनाएको छ ।
वर्षापछिको बाढी, पहिरो र डुबानले एक हजार पाँच सय ६६ घर बस्नै नमिल्ने गरी क्षति भएको र तीन हजार एक सय ७८ घर केही मात्रामा क्षति पुगेको दाङ केन्द्रले बताएको छ । बाढी र डुबानमा परी झन्डै दुई हजार सात सय पशुचौपाया मरेको र एक हजारभन्दा बढी घाइते भएको केन्द्रको तथ्यांकमा उल्लेख छ ।
त्यस्तै जिल्लाका १० पालिकामध्ये देउखुरीका चार वटा पालिकामा सबैभन्दा बढी क्षति पुगेको छ । देउखुरीको लमही नगरपालिका, राप्ती गाउँपालिका, राजपुर गाउँपालिका र गढवा गाउँपालिकामा मात्रै नौ सय ६४ घरमा क्षति पुगेको छ । उक्त स्थानमा क्षति पुग्दा चार हजार बढी परिवार विस्थापित भएका छन् ।
जिल्ला आपत्कालीन कार्य सञ्चालन केन्द्रका अनुसार जिल्लाका राजपुर गाउँपालिकामा तीन सय २५, बंगलाचुली गाउँपालिकामा तीन सय, लमही नगरपालिकामा दुई सय ६५, गढवा गाउँपालिकामा दुई सय ५४ र राप्ती गाउँपालिकामा एक सय २० घर भत्किएका छन् । त्यस्तै घोराही उपमहानगरपालिकामा ८०, तुलसीपुर उपमहानगरपालिकामा ९७, बबई गाउँपालिकामा ७०, शान्तिनगर गाउँपालिकामा ४४ र दंगीशरण गाउँपालिकामा ३० घरमा क्षति पुगेको छ ।
बाढी, पहिरो र डुबानमा परेका पीडितहरूलाई राहत वितरण गर्ने कार्य जारी रहेको प्रमुख जिल्ला अधिकारी हिरालाल रेग्मीले बताए । हालसम्म १७ लाख रुपैँया बढीको राहत वितरण भइसकेको र वितरण कार्य जारी रहेको प्रजिअ रेग्मीले जानकारी दिए । राहत वितरणमा एकरूपता कायम गर्न सम्बन्धित क्षेत्रको पालिकाबाट मात्रै राहत वितरण गर्ने निर्णय गरिएको प्रजिअ रेग्मीको भनाइ छ ।
त्यस्तै बाढी र पहिरोमा परी नौ जनाको मृत्यु भएको जिल्ला प्रहरी कार्यालय दाङका प्रमुख विरबहादुर वलीले जानकारी दिए । अविरल वर्षाका कारण जिल्लामा बाढी र डुबानका कारण किसानले लगाएका धानबालीमा ठूलो मात्रा क्षति पु¥याएको छ । अन्य क्षतिको विवरण संकलन कार्य जारी रहेको सम्बन्धित पालिकाहरूले बताएका छन् ।
