कोहलपुर (बाँके) : कोहलपुर नगरपालिका वडा नं. ८ पिपिरी चोकमा शंकास्पद बस्तु फेला परेको छ । रत्नराजमार्ग अन्तर्गत सुर्खेत नेपालगञ्ज सडकखण्डको पिपिरी चोकमा बम जस्तो देखिने शंकास्पद रातो वस्तु फेला परेको प्रहरीले जनाएको हो ।
ईलाका प्रहरी कार्यालय कोहलपुरका अनुसार पलाष्टिकले बेरेर करीब एक हात बराबरको रातो स्टिल बम जस्तो देखिने शंकास्पद वस्तु भेटिएको हो । मंगलबार नेपाल बन्द आह्वान गरेको नेत्रविक्रम चन्द विपलव नेतृत्वको नेकपाले ती शंकास्पद वस्तु राखेको हुनसक्ने प्रहरीले आशंका गरेको छ ।
उक्त शंकास्पद वस्तु निस्क्रिय पार्न नेपाली सेनाको टोली बोलाइएको ईलाका प्रहरी कार्यालय कोहलपुरले जनाएको छ । बम जस्तो बस्तु देखिएपछि नेपालगञ्ज तर्फ आउने सवारी साधनलाई पश्चिम तिरको बाटो प्रयोग गराईएको छ ।
बन्दका कारण कोहलपुर सहित लुम्बिनी प्रदेशका कुनै पनि जिल्लामा लामो तथा छोटो दुरीका सवारी साधन चल्न सकेका छैनन । राति छुटेका गाडीहरुलाई भने प्रहरीले बिहान स्कटिङ गरेर गन्तव्यसम्म पठाएको थियो तर केही माल बाहक लहरीहरु भने चप्परगौरीमा रोकिएका छन् ।
