नरैनापुर (बाँके) : बाँकेको नरैनापुर गाउँपालिकामा बर्षात नहुँदा धान रोपाई प्रभावित भएको छ ।
सिँचाइको व्यवस्था नभएका कारण आकाशे पानीको भरमा धानखेती गर्दै आएका नरैनापुरका किसान अहिलेसम्म पनि रोपाई गर्न नपाउँदा चिन्तित भएका छन् ।
स्थानीयवासी सोहनलाल यादवले नरैनापुर क्षेत्रमा पर्याप्त बर्षात नभएका कारण अहिलेसम्म करिब १५ प्रतिशत मात्र धान रोपाई भएको जानकारी दिए । उनले भने , ‘रोपाई भएको धान पनि खडेरीले गर्दा सुक्दै गएको छ ।’
नरैनापुरमा खडेरीका कारण हालसम्म १५ प्रतिशत मात्रै रोपाई भएको कृषि ज्ञान केन्द्र बाँकेका प्रमुख सागर ढकालले बताए ।
नरैनापुरमा धान खेती हुने क्षेत्रफल करिब चार हजार दुई सय हेक्टर रहेको जनाइएको छ ।
![](https://sadarline.com/wp-content/uploads/2023/06/355735841_163168713323414_6806641009584846467_n.jpg)
![](https://sadarline.com/wp-content/uploads/2023/10/Ntc-add-1-.jpg)
बर्षात नभएर धान रोपाइँ हुन नसकेपछि नरैनापुर गाँउपालिकाले नरैनापुरलाई सुक्खा क्षेत्र घोषणा गरेको छ ।
वैकल्पिक सिँचाइको उपाय गरेर लगाएको धानबालीसमेत खडेरीका कारण नष्ट भइरहेको गाउँपालिका अध्यक्ष इस्तियाक अहमद शाहले जानकारी दिए ।
गाउँपालिकाले सुक्खा क्षेत्र घोषणा भइसकेकाले किसानका लागि विशेष राहतको प्याकेज ल्याउन प्रदेश र सङ्घीय सरकारसँग गाउँपालिकाले आग्रह गरेको छ ।
खडेरीले गर्दा कृषिमा आश्रित बहुसङ्ख्यक जनताको जीवन कष्टकर बन्दै गएको अवस्थाप्रति प्रदेश र सघीय सरकारको यथेष्ट ध्यान पुग्न जरुरी रहेको गाउँपालिका अध्यक्ष शाहको भनाइ छ ।