नेपालगञ्ज : बाँकेमा सोमवार थप ६ जनामा कोरोना भाइरस संक्रमण पुष्टि भएको छ । भेरी अस्पताल नेपालगञ्जमा ५ र जमुनाहा नाकामा १ जना गरी ६ जनामा भाइरस संक्रमण पुष्टि भएको जिल्ला कोभिड–१९ व्यवस्थापन केन्द्रका फोकलपर्सन तेज वलीले जानकारी दिए ।
संक्रमण पुष्टि भएकामध्ये बाँकेका तीन छन् । अन्य तीन जना जिल्ला बाहिरका हुन् । योसँगै जिल्लामा कूल संक्रमितको संख्या २१ हजार २ सय ७७ पुगेको छ । यस्तै सोमवार थप ६ जना निको भएका छन् । योसँगै निको हुनेको संख्या २० हजार ८ सय ४३ पुगेको छ ।
जिल्लामा कूल सक्रिय संक्रमितको संख्या ८१ रहेको फोकलपर्सन वलीले बताए । भेरी अस्पतालको कोभिड वार्डमा ५ जना उपचारत रहेका छन् । उनीहरु अधिकांशले कोभिड विरुद्धको खोप नलगाएको पाइएको वलीले बताए ।
