नेपालगञ्ज : जैविक विविधताले भरिपूर्ण देशकै ठूलो सीमसार क्षेत्र बर्दियाको बढैयाताल जलकुम्भीले कुरुप बनेको छ । जलकुम्भीले मुख्य विशेषता तालभरी रहेको कमलको फूल पुरै नष्ट गरिदिएको छ ।
बर्दिया जिल्लाको बढैयाताल गाउँपालिका–५ बढैया गाउँमा पर्ने बढैयातालले उचित संरक्षण पाएको छैन । अहिले कमलको पात र जरा पनि भेटिन मुस्किल पर्ने बढैयातालको किनारमै निजी तालमा माछापालन गरिरहेका बढैयाताल–५ का मिश्रीलाल चौधरीले बताए ।
स्थानीय सरकारले माछाको ठेक्का नदिएको पनि चार वर्ष भयो । पहिले माछा मार्ने क्रममा जलकुम्भी सबै सफा हुन्थ्यो । जनप्रतिनिधिले माछा पाल्न ताल ठेक्का दिएनन् । हरेक वर्ष जलकुम्भीले ताल भरिँदैछ । सफा गर्न पनि कसैको ध्यान पुगेको छैन ।
नेपाल सरकारको देशभरका १०० पर्यटकीय गन्तव्यमा बढैयाताललाई राखे पनि पर्यटकीय गतिविधि बढ्नुको साटो घट्दो छ । बढैयाताल गाउँपालिकाका प्रमुख प्रशासकीय अधिकृत धर्मराज न्यौपाने अब चाँडै नै जलकुम्भी सफा गरेर ताल संरक्षित गरिने बताए ।
