नेपालगञ्ज : बाँकेका किसानले सस्तो मूल्यमा धान विक्री गर्न बाध्य भएका छन् । कार्तिक पहिलो साता आएको बर्षाले ठूलो क्षति ब्यहोरेका किसानहरुले बचेको धान पनि सस्तो मूल्यमा विक्री गर्न बाध्य भएका हुन् ।
जिल्लामा कम्तीमा पनि ३० प्रतिशत धान बालीमा बर्षाले पूर्णरूपमा क्षति पुगेको थियो । व्यापारीले धान सस्तो मूल्यमा खरिद गर्न लागेपछि किसानको लगानी समेत नउठ्ने भएको हो ।
सरकारले तोकेको मूल्य व्यापारीले नदिने र सरकार आफै खरिद नगर्ने भएकाले किसानले सस्तो मूल्यमा धान वेच्न बाध्य छन् । हाल व्यापारीले धानको मूल्य प्रति क्विन्टल १५ सय देखि २ हजार सम्म मात्र दिने गरेको किसानहरू बताउँछन् ।
सरकारले यस वर्ष मोटा धान प्रति क्विन्टल २ हजार ७ सय ५२ रुपैयाँ र मध्यम धान प्रति क्विन्टल २ हजार ८ सय ८५ रुपैयाँ तोकेको छ । मूल्य निर्धारण गरेपनि धान खरिदको कोटा भने अझै निर्धारण गर्न सकेको छैन् । जस्को मार किसानलाई परेको हो ।
