नेपालगञ्ज : नेकपा एमालेले शनिवार वडा अधिवेशन गर्दैछ । देशभरी नै वडा अधिवेशन गर्ने कार्यतालिका अनुसार बाँकेमा पनि वडा अधिवेशन हुने भएको हो । बाढी प्रभावित जिल्लामा भने अधिवेशन हुने छैन् ।
नेकपा एमाले बाँकेका अध्यक्ष निरक गुरुङले जिल्लाका ८१ वटै वडामा अधिवेशन हुने जानकारी दिए । वडा अधिवेशनबाट चार वर्षीय कार्यकालका लागि नेतृत्व छनौट हुनेछ । अधिवेशनको सम्पूर्ण तयारी पूरा भइसकेको उनको भनाइ छ ।
अधिवेशनले नयाँ नेतृत्व चयन गर्ने भएकाले आंकाक्षीहरु नेताहरुसँगको लविङमा छन् । कतिपयले कार्यकर्तासँग भेटघाटलाई व्यस्त तुल्याएका छन् । वडाअधिवेशन सकेपछि यही ९ गते पालिका अधिवेशन हुने छ ।
बाँकेमा एमालेका ८ हजार सदस्य छन् । एमालेले आगामी मंसिरमा पार्टीको दसौं राष्ट्रिय महाधिवेशन चितवनमा गर्ने भएको छ ।
