नेपालगञ्ज : कोरोना भाइरस संक्रमणका कारण बाँकेमा थप २ जनाको मृत्यु भएको छ । मृतकमध्ये एक जना बाँकेका हुन् भने एक जना बर्दियाका हुन् ।
नेपालगञ्जस्थित भेरी अस्पतालमा उपचारका क्रममा खजुरा गाउँपालिका २ बाँकेका ६० वर्षीया महिलाको मृत्यु भएको जिल्ला कोभिड व्यवस्थापन केन्द्रका फोकलपर्सन तेज ओलीले जानकारी दिए ।
भदौ २७ गते कोरोना भाइरस संक्रमण पुष्टि भएपछि उनलाई उपचारका लागि भदौ २८ गते भेरी अस्पतालको कोभिड वार्डमा भर्ना गरिएको थियो । स्वास्थ्यमा सुधार नआउँदा उनको शुक्रवार राती ११ बजे मृत्यु भएको हो ।
यस्तै मधुवन नगरपालिका वडा नं. २ बर्दियाकी ४२ वर्षीया महिलाको मृत्यु भएको छ । भदौ ३१ गते रिपोर्ट पोजेटिभ आएको उनलाई सोही दिन भेरी अस्पतालमा भर्ना गरिएको थियो । स्वास्थ्यमा सुधार नआउँदा उनको शनिवार बिहान ११ बजे मृत्यु भएको हो ।
योसँगै कोरोना संक्रमणका कारण बाँकेका ३३१ जनाको हालसम्म मृत्यु भईसकेको छ भने बाँकेमा उपचार गराउन आएका बाहिरी जिल्लाका ४१३ जनाको मृत्यु भईसकेको छ ।
