सन्दर्भ : बालदिवस
नेपालगञ्ज : ५७ औं राष्ट्रिय बाल दिवसको अवसरमा बाँके युनेस्को क्लबले नेपालगञ्ज र डुडुवाका बालश्रमिकलाई राहातस्वरुप मंगलवार खाद्यान्न र शैक्षिक सामाग्री वितरण गरेको छ ।
विश्व शिक्षाको सहयोग र नेपालगञ्ज उपमहानगरको समन्वयमा क्लबले सञ्चालन गरेको सक्रिय परियोजना अन्तर्गत घट्ना व्यवस्थापन गरिएका अति विपन्न तथा जोखिममा रहेका नेपालगञ्ज र डुडुवाका ९ जना बालश्रमिकलाई खाद्यान्न र शैक्षिक सामाग्री वितरण गरेको हो ।
आर्थिक अभावले नेपालगञ्ज उपमहानगर र डुडुवा गाउँपालिकामा रहेका इट्टा भट्टामा काम गर्ने बालश्रमिकहरुलाई जिविकोपार्जन र शिक्षाका लागि सहजता होस भन्ने उद्देश्यले खाद्यान्न तथा शैक्षिक सामाग्री वितरण गरिएको क्लबका प्रमुख संरक्षक प्रवेज अली सिद्दिकीले जानकारी दिए ।
क्लबको कार्यालयमा आयोजना गरिएको एक कार्यक्रममा क्लबका अध्यक्ष राजेन्द्र चौधरी, कार्यसमिति सदस्य फिरदौस जहाँ, कार्यकारी निर्देशक रवि तुलाधर लगायतले बालश्रमिकहरुलाई खाद्यान्न र शैक्षिक सामाग्री वितरण गरे ।
सो अवसरमा बोल्दै क्लबका अध्यक्ष राजेन्द्र चौधरीले यो राहत बालश्रम अन्त्य गर्नका लागि वितरण गरिएको जनाउँदै आफ्ना बालबालिकालाई बालश्रममा नलगाउन अभिभावकसंग आग्रह गरे । बालबालिकाको पढ्ने उमेरमा उनिहरुलाई विद्यालय पठाउनु पर्ने कुरामा जोड दिंदै उनले घरको आर्थिक जोहो अभिभावकले गर्नुपर्नेमा जोड दिए ।
सो कार्यक्रममा टीडीएचले प्राविधिक सहयोग गरेको कार्यकारी निर्देशक रवि तुलाधरले बताए । खाद्यान्न तथा शैक्षिक सामाग्री वितरण कार्यक्रममा सक्रिय परियोजनाका अधिकृत गुलाम गौस र अन्य कर्मचारीहरुको पनि सहभागिता रहेको थियो । सो परियोजना मार्फत नेपालगञ्ज र सो वरिपरिका इट्टा भट्टामा सानै उमेरदेखि काम गरिरहेका बालबालिकालाई बालश्रमबाट मुक्त गरेर उनीहरुलाई विद्यालय पठाउने वातावरण बनाउने उदेश्य राखिएको छ ।
