नेपालगञ्ज : प्रहरीले नेपालगञ्जमा भाडामा कोठा लिएर अबैध लागू औषधको कारोबार गर्दै आएका दुई भारतीय नागरिक सहित ३ जनालाई ४३ ग्राम ब्राउन सुगर सहित शुक्रबार राती नियन्त्रणमा लिएर अनुसंधान सुरु गरेको छ ।
लागू औषध व्यूरो नेपालगञ्जले प्राप्त गरेको सुचनाको आधारमा शुक्रबार राती ८ बजे नेपालगञ्ज–१२ कोरियनपुर ३ तले घरबाट भारतको बहराईच जिल्ला कोतवाली नानपारा बाईपासका २८ वर्षिय सलमान खान, भारत लखनउ कोतवाली घर भएका २८ वर्षिय मुस्तकिम र नेपालगञ्ज–११ टाँगास्टेशन बस्ने वर्ष २१ को आजाद कबडियालाई सो ब्राउन सुगर सहित नियन्त्रणमा लिएको हो ।
प्रहरीले उनीहरु बस्ने कोठामा सर्च गर्दा सलमानले लगाएको हापपैन्टको अगाडिको पकेटबाट ४३ ग्राम ब्राउन सुगर र डिजिटल तराजु समेत बरामद गरेको थियो । प्रहरी नियन्त्रणमा रहेका सलमानको साथबाट ‘दिल्ली क्राईम’ रिर्पोटर को परिचय पत्र समेत बरामद भएको छ । बाँके प्रहरीले सो घटनाको बारेमा शनिबार ११ बजे पत्रकार सम्मेलन गर्ने जनाएको छ ।
