बर्दिया : पूर्व–पश्चिम राजमार्गअन्तर्गत पर्ने बर्दिया राष्ट्रिय निकुञ्जभित्र एम्बुलेन्सले ठक्कर दिँदा घाइते भएको वयस्क पाटेबाघ अझै भेटिएको छैन । निकुञ्जभित्र पर्ने राजमार्गको रम्मापुर–सैनवार सडकखण्ड बीचमा पर्ने बबई पुलदेखि पूर्व बुढी खोला नजिक एम्बुलेन्सको ठक्करबाट शनिबार बिहान घाइते भएको पाटे बाघ अझै नभेटिएको निकुञ्ज प्रशासनले जनाएको छ ।
नेपालगञ्जबाट पश्चिम तर्फ जाँदै गरेको से १ च २४२१ नम्बरको एम्बुलेन्सले बुढी खोलानजिक पाटे बाघलाई ठक्कर दिएको थियो । एम्बुलेन्सले बाघलाई ठक्कर दिए लगत्तै एम्बुलेन्स चालकले बाघ घाइते भएको निकुञ्ज प्रशासनलाई खबर गरेका थिए। एम्बुलेन्स चालकले खबर गरेलगत्तै निकुञ्ज सुरक्षार्थ खटिएको नेपाली सेना र निकुञ्जको टोलीले घाइते भएको बाघको खोजी गरिरहेको छ ।
‘घटनास्थल राजमार्गमा बाघको रगत थियो, एम्बुलेन्समा बाघको रौँहरू पनि टाँसिएको थियो, त्यसैले बाघ आफू पनि जोखिममा र हिँडडुल गर्नेहरूका लागि पनि जोखिम हुने भएकाले घटनास्थल आसपासमा सेनासहित निकुञ्जको टोली खटिएको र घाइते बाघको खोजी भइरहेको बर्दिया राष्ट्रिय निकुञ्जका सहायक संरक्षण अधिकृत असीमकुमार थापाले बताए ।
बर्दिया राष्ट्रिय निकुञ्ज मुख्यालय ठाकुरद्वाराबाट घटनास्थलतर्फ घाइते बाघको खोजीका लागि ३ वटा हात्ती सहितको टोली र स्वीप गस्ती समेत खटिएको छ। हात्तीको सहायताबाट आइतबार बिहानैदेखि घाइते बाघको खोजी शुरू गरिएको भएपछि अझै नभेटिएको सहायक संरक्षण अधिकृत थापाले बताए। एम्बुलेन्स र चालक निकुञ्जले नियन्त्रणमा लिएको छ ।
पूर्व–पश्चिम राजमार्ग भित्र पर्ने बर्दिया निकुञ्जको अम्रेनी चिसापानी सडकको बीचमा यसअघि बस र कारको ठक्करबाट दुई वटा बयस्क पाटे बाघ मरेका छन् भने मोटरसाइकलमै सवार एक महिलाको ज्यान गएसँगै दुई महिनादेखि लगातार रुपमा राजमार्ग छेउमा पाटे बाघ देखिन थालेका छन् ।
निकुञ्जभित्र पर्ने राजमार्गको दायाँ–बायाँ ३१÷३१ मिटर क्षेत्र तत्कालका लागि झाडी सफा गर्नुपर्ने स्थानीयको माग छ । निकुञ्जभित्र पर्ने राजमार्ग र खाता जैविक मार्ग क्षेत्रमा पर्ने हुलाकी सडकमा यथासक्य छिटो वन्यजन्तुमैत्री संरचना बनाउन संरक्षणकर्मीहरूले माग गरेका छन् ।
यस्तै, निकुञ्ज अन्तरगत पर्ने राजमार्गमा एम्बुलेन्स बाहेकका सवारी साधनमा टाइम कार्ड लागू गरिएको छ । निकुञ्ज अन्तरगत पर्ने राजमार्गको रम्मापुर–सैनवार खण्ड र अम्रेनी चिसापानी खण्डमा टाइम कार्ड लागू गरिएको छ ।
अहिले एम्बुलेन्सले बाघलाई ठक्कर दिएपछि एम्बुलेन्सले बिरामी बोकेको खण्डमा बाहेक अन्य समयमा एम्बुलेन्समा पनि टाइम कार्ड लागू गरिनुपर्ने संरक्षणकर्मीहरूबाट आवाज उठ्न थालेको छ ।
