नेपालगञ्ज : कोरोना भाइरस संक्रमित कैलालीका एक पुरुषको बाँकेमा मृत्यु भएको छ । टिकापुर नगरपालिका वडा नम्बर १, कैलालीका ६० वर्षीय कोरोना संक्रमित पुरुषको भेरी अस्पताल नेपालगञ्जमा उपचारका क्रममा शनिवार राती १ बजे मृत्यु भएको हो ।
उनको स्वास्थ्यमा समस्या देखिएपछि कात्तिक १४ गते अस्पतालको प्री–आइसोलेशन वार्डमा भर्ना गरिएको थियो । कोरोनाको आशंकामा १४ गते कोरोना परिक्षणका लागि स्वाब संकलन गरिएको र १५ गते आएको रिपोर्टमा उनलाई कोरोना संक्रमण देखिएको थियो ।
कोरोना पुष्टि भएपछि उनलाई अस्पतालको कोभिड १९ वार्डमा भर्ना गरि उपचार शुरु गरिएको जिल्ला कोभिड १९ संकट ब्यवस्थापन केन्द्रका फोकल पर्सन नरेश श्रेष्ठले जानकारी दिए । यो सँगै बाहिरी जिल्लाबाट कोरोना उपचार गर्न बाँके आएर मृत्यु हुनेको संख्या २० पुगेको छ ।
बाँकेमा हिजो मात्रै ३ जना संक्रमितको एकैदिन मृत्यु भएको थियो । नेपालगन्ज मेडिकल कलेज शिक्षण अस्पताल कोहलपुरमा बाँकेका एक र दाङका दुई गरी ३ जना संक्रमितको उपचारकै क्रममा मृत्यु भएको थियो ।
