काठमाण्डौ : संसदको दुवै सदनले पारित गरेको कृषि विधेयकको विरोधमा भारतमा शुक्रवार चक्काजाम भएको छ । किसान संगठनले देशभर चक्काजामको आह्वान गरेको हो ।
सरकारले विधेयक किसानको हितैषी भएको भन्दै यसबाट किसानको आय बढ्ने र उनीहरुको उत्पादनको लागि बजार खुल्ने दाबी गरेको छ । तर किसान संगठनले भने विधेयक कृषि क्षेत्रलाई कर्पोरेटको जिम्मा लगाउने कोशिस भएको आरोप लगाएका छन् ।
विधेयकको विरोधमा पंजाब र हरियाणामा सबैभन्दा धेरै प्रदर्शन भएका छन् । पंजाबमा बिहीवार रेल रोक अभियान पनि चलेको थियो । किसान संगठनले शुक्रवार देशभरिनै विधेयकको विरोधमा प्रदर्शन गर्ने बताएको भारतीय सञ्चारमाध्यमहरुले जनाएका छन् ।
