सदरलाइनडटकम,
नेपालगञ्ज : बाँकेको नेपालगञ्जमा कोरोना संक्रमित भेटिएपछि नेपालगञ्जका तीन स्थानलाई सिल गरिएको छ । संक्रमण अन्यमा फैलिन नदिने उद्देश्यले ती स्थानहरुमा सिल गरिएको हो ।
नेपालगञ्ज उपमहानगरपालिका वडा नं ७ को डिएसपीरोड निवासी ६० वर्षीय पुरुषमा कोरोना संक्रमण पुष्टि भएपछि उनको घर, उनले काम गर्ने नेपालगन्ज वडान. ८ को महेन्द्रपार्क पछाडिको मस्जिद र नेपालगन्जको धम्बोझी चोकमा रहेको मस्जिदलाई सिल गरिएको जिल्ला प्रहरी कार्यालय बाँकेका प्रवक्ता समेत रहेका प्रहरी नायव उपरीक्षक शिवबहादुर सिंहले जानकारी दिए ।
संक्रमित पुरुष डिएसपी रोडस्थित घरबाट महेन्द्र पार्कस्थित मस्जिदमा दैनिक अजान दिन र त्यहाँको मदरसामा पढाउन समेत आउजाउ गर्दै आएको कारण उनी थुप्रै व्यक्तिहरुको सम्पर्कमा पुगेको हुनसक्ने भन्दै सिल गरिएको हो ।
यसैगरी नेपालगञ्ज धम्वोजीको मस्जिदमा बस्दै आएका एक युवामा पनि संक्रमणको आशंका गरिएपछि यो क्षेत्र सिल गरिएको हो । ती युवा धम्बोजीस्थित मस्जिदमा बस्दै आएका थिए ।
बाँके प्रशासनले संक्रमित व्यक्तिको घरपरिवार, आफन्त र उनी सम्पर्कमा आएको स्थान, समुहको पहिचान गरी उनीहरुमा संक्रमण भए नभएको बारेमा परिक्षण गर्ने तयारी गरेको जनाएको छ ।
