सदरलाइनडटकम, 
नेपालगञ्ज : मिस नेपाल २०२० को नेपालगञ्ज अडिसन आगामी फागुन ३० गते हुने भएको छ । द हिडन टिजरले हरेक वर्ष गर्दै आएको मिस नेपाल २०२० को नेपालगञ्ज अडिसन आउदो शुक्रबार हुने भएको हो ।
बुधबार मिस नेपाल २०२० को क्षेत्रीय संयोजक नेपालगञ्ज जेसिसले नेपालगञ्जमा पत्रकार सम्मेलन गर्दै सो कुराको जानकारी दिएको छ ।
मिस नेपाल प्रतियोगितामा भाग लिन चाहनेले मिस नेपालको आधिकारिक वेबसाइट ‘मिस नेपाल डटकम डटएनपी’ मा गएर आवेदन दर्ता गर्न सक्नेछन् ।
मिस नेपालको अडिसन फाराम निशूल्क भर्न सकिने नेपालगञ्ज जेसिसका अध्यक्ष प्रज्वल श्रेष्ठले जानकारी दिए । नेपालभरमा ९ शहरबाट मिस नेपालको अडिसन हुने द हिडन टिजरका निर्देशक प्रमोद बंशाकारले जानकारी दिए ।
अडिसन नेपालगञ्ज, बुटवल, काठमाडौं सहित धनगढी, पोखरा, चितवन, वीरगञ्ज, विर्तामोड र धरानमा हुने उनले बताए । आयोजकका अनुसार मोफसलमा मिस नेपालको सहभागिता जनाएका र मापदण्ड पुगेकालाई काठमाडौं बोलाइनेछ ।
मिस नेपालमा १९ वर्षदेखि २६ वर्ष उमेर समूहका युवतीहरुले सहभागिता जनाउन सक्ने आयोजकले जनाएको छ । आयोजकका अनुसार सन् २०२० मा मे १५ मा मिस नेपाल घोषणा गरिनेछ । २०२० की मिस नेपालले २ लाख ५० हजार पाउनेछिन् ।
