सदरलाइनडटकम,
नेपालगञ्ज : प्रधानमन्त्री कप अन्तर्राष्ट्रिय आमन्त्रण महिला भलिबल प्रतियोगिताको छैठौं संस्करण आइतवारबाट नेपालगञ्जमा शुरु भएको छ । प्रदेश ५ का मुख्यमन्त्री शंकर पोखरेलले पानसमा दिप प्रज्वलन तथा रेफ्रीलाई बल हस्तान्तरण गरेर प्रतियोगिताको उद्घाटन गरे ।
बाँकेलाई खेलकुदको हब बनाउनुपर्ने बताउँदै उनले खेलकुदको विकासका लागि संघीय सरकार सदैव तयार रहेको धारणा राखे । फागुन २२ गते सम्म सञ्चालन हुने प्रतियोगितामा आयोजकको तफैबाट नेपालगञ्ज वडा नं. ६ ले भाग लिएको छ भने बिभागीय टोलीसँगै अन्य टिम र भारतीय शसस्त्र सीमा बल (एसएसबी) र पश्चिम बंगालको टिमले सहभागिता जनाएका छन् ।
प्रतियोगिता मूल आयोजक समितिकी संयोजक प्रदेश सांसद् कृष्णा केसीका अनुसार प्रथम हुनेले २ लाख, उपविजेताले १ लाख र तृतीय हुनेले ५० हजार नगद पाउने छन् । दक्षिण एशियाकै नम्बर एक प्रतियोगिताका रुपमा स्थापित गराउन यस बर्षदेखि समाजका प्रतिष्ठित व्यक्तिहरुलाई मूल आयोजक समितिमा राखिएको बाँके जिल्ला भलिबल संघका अध्यक्ष टिएस ठकुरीले बताए ।
प्रतियोगितामा ३० लाख खर्च हुने अनुमान गरिएको छ । प्रतियोगिताको समापन प्रदेश ५ का समाजिक बिकास मन्त्री सुदर्शन बरालले गर्ने तय भएको छ ।
पीएम कप महिला भलिबल नेपालगञ्जमा शुरु
१८ फाल्गुन २०७६, आईतवार १८:३०
