सदरलाइनडटकम,
काठमाण्डौ : भारतको जम्मू कश्मीर राज्यको कुलगाम जिल्लामा बिहीवार गएको हिमपहिरोमा परि ६ जना प्रहरीसहित १० जना बेपत्ता भएका छन् । श्रीनगर–जम्मू राजमार्गमा गएको हिमपहिरोमा परि सुरक्षामा तैनाथ रहेका प्रहरी बेपत्ता भएका हुन् ।
हिमपहिरोमा २० जना पुरिएपनि १० जनाको सुरक्षित उद्धार गरिएको भारतीय सञ्चारमाध्यमले जनाएका छन् । बेपत्ता भएका १० जनामा ६ जना प्रहरी, दुई जना अग्नि नियन्त्रक र दुई जना स्थानीय नागरिक रहेका छन् । अधिकारीहरुका अनुसार प्रहरीलगायतको उद्धार टोली घटनास्थलमा खटिएको छ ।
बुधवारबाट नै कश्मिर घाटीमा भारी हिमपात भएको हो । पछिल्लो २४ घण्टामा कुलगाममा सबैभन्दा बढी हिउँ परेको थियो । कुलगामको केही भागमा पाँच फीटसम्म हिउँ परेको थियो । जम्मू कश्मीरका २२ जिल्लामध्ये १६ जिल्लाका विभिन्न ठाउँमा हिमपहिरो जान सक्ने चेतावनी त्यहाँको मौसम विभागले दिएको छ ।
(एजेन्सीको सहयोगमा)
हिमपहिरोमा परी कश्मिरमा ६ प्रहरीसहित १० बेपत्ता
२५ माघ २०७५, शुक्रबार १०:३६
