अफगानिस्तान प्रिमियर लिगको ‘ड्राफ्ट’मा नेपालका ३ खेलाडी

२४ भाद्र २०७५, आईतवार १९:४९
 

काठमाडौं– अफगानिस्तान प्रिमियर लिग (एपिएल) टी–२० क्रिकेट प्रतियोगिताको पहिलो चरणको ड्राफ्टमा नेपालका ३ खेलाडी परेका छन्।

आगामी आसोज १९ देखि कार्तिक २ सम्म युएईको शारजाहमा हुने एपिएलमा पहिलो चरणको ड्राफ्टमा नेपाली राष्ट्रिय टिमका कप्तान पारस खड्का, तीव्र गतिका बलर सोमपाल कामी र युवा लेग स्पिनर सन्दीप लामिछाने पारेको स्रोतले दाबी गरेको छ। सन्दीप लामिछाने र सोमपालले एउटै एजेन्टमार्तफ नाम दर्ता गराएको स्रोतको दाबी छ।

पारस र सोमपाल टेस्ट राष्ट्रले आयोजना गर्ने टी–२० लिगको ड्राफ्टमा पहिलो पटक परेका हुन्। सन्दीप भने पाँचौ पटक परेका हुन्। यसअघि सन्दीप बंगलादेश (बिपिएल), पाकिस्तान (पिएसएल), भारत (आइपिएल) र वेस्ट इन्डिज (सिपिएल) ले आयोजना गर्ने टी–२० लिगको ड्राफ्टमा परेका थिए। जसमध्ये सन्दीप आइपिएल र सिपिएलमा छनोट हुन सफल भएका थिए।

ड्राफ्टमा नेपालका ३ खेलाडीसहित ३ सय ५० बढी खेलाडी परेका छन्। ड्राफ्टमा टेस्ट राष्ट्रहरु अफगानिस्तान, पाकिस्तान, बंगलादेश, श्रीलंका, वेस्ट इन्डिज, दक्षिण अफ्रिका, अस्ट्रेलिया, इंग्ल्यान्ड, आयरल्यान्ड र जिम्बावेका खेलाडी समावेश छन्। यस्तै ६ वटा एसोसियट राष्ट्रका खेलाडीले पनि स्थान पाएका छन्। जसमा नेपालसहित युएई, स्कटल्यान्ड, हङकङ, ओमान र क्यानडा छन्।

खेलाडीहरुलाई ६ श्रेणीमा राखिएको छ। आइकन, डाइमन्ड, गोल्ड, सिल्भर, आइसिसी एसोसिएट र इमर्जिङ गरी ६ श्रेणी निर्धारण गरिएको छ।

अफगानिस्तान क्रिकेट बोर्डको आयोजनामा हुने प्रतियोगिताको ड्राफ्टबाट खेलाडी अक्सन भोलि सोमबार दुबईमा हुनेछ।

लिगमा ५ टिमको सहभागिता रहेको छ। जसमा काबुल, बाल्ख, पाक्किया, नान्गहर र कान्दहर रहेका छन्। ५ टिमबीच २३ खेल हुनेछ।

अन्तर्राष्ट्रिय क्रिकेट काउन्सिल (आइसिसी) ले मान्यता दिएको प्रतियोगितामा ४० बढी विदेशी खेलाडीले भाग लिने अफगानिस्तान क्रिकेट बोर्डको दाबी छ। क्रिस गेल, ड्वाइन ब्राभो, आन्द्रे रसेल, क्रिस लियोन, शाहिद अफ्रिदी जस्ता खेलाडीले एपिएल खेल्ने अफगानिस्तान क्रिकेट बोर्डको भनाइ छ। भारतीय क्रिकेट कन्ट्रोल बोर्डले खेलाडीहरुलाई अनुमति नदिएपछि भारतका खेलाडीले भने एपिएल खेल्नेछैनन्।
नेपाललाइभबाट

Next Post

तीस हजार घुससहित प्रहरी निरिक्षक महता र एक स्थानीय अख्तियारको फन्दामा

२४ भाद्र २०७५, आईतवार १९:४९
सदरलाइनडटकम, मैनापोखर (बर्दिया) : अख्तियार दुरुपयोग अनुसंधान आयोग बुटवलको सम्पर्क कार्यालय नेपालगन्जबाट खटी गएको टोलिले प्रहरी निरिक्षकसहित दुई जनालाई घुससहित रंङ्गेहात नियन्त्रणमा लिएर अनुसंधान सुरु गरेको छ । ईलाका प्रहरी कार्यालय मैनापोखरका ईन्चार्ज प्रहरी निरिक्षक गणेश सिंह महता र स्थानीय मध्यस्थकर्ता मैया पौडेललाई ३० हजार नगदसहित नियन्त्रणमा लियर अनुसंधान सुरु […]

सम्बन्धित