कोहलपुर (बाँके) : माओवादी अध्यक्ष तथा पूर्वप्रधानमन्त्री पुष्पकमल दाहाल प्रचण्डले सरकारले अहिले जताततै बेथिति बढाएको उल्लेख गर्दै पार्टीले सरकारविरुद्ध खबरदारी अभियान थालेको स्पष्ट परेका छन् ।
अखिल नेपाल महिला संघ (क्रान्तिकारी) को दोस्रो लुम्बिनी प्रदेश सम्मेलनको बाँकेको कोहलपुरमा उद्घाटन गर्दै सो आरोप लगाएका हुन ।
उनले विद्युत प्राधिकरणको नेतृत्व हटाउने, त्रिभुवन विश्वविद्यालयका उपकुलपतिलाई काम गर्न नदिनेदेखि राष्ट्र बैंकमा आफ्नो अनुकूल गभर्नर ल्याउन अस्वभाविक रुपमा कार्यविधि परिवर्तन गर्नेसम्मका काम भइरहेको आरोप लगाए।
उनले बिचौलिया र दलालको कब्जामा एमाले काँग्रेस रहेको दाबी गर्दै बर्तमान सरकारबाट केही आशा गर्न सकिने अवस्था नरहेको उल्लेख गरे ।
उनले बर्तमान सरकारको जग नै गलत भएकाले यसले अझ बढी गलत गर्दै जाने खतरा देखेर नै आफुहरुले जनतालाई सुुसुचित पार्नको लागि हुलाकी सडक केन्द्रीत तराई मधेश जागरण अभियान लिएर आएको बताए ।
माओवादी अध्यक्ष प्रचण्डले पार्टीले केही समय स्थगित गरेको जनतासँग माओवादी, तराई मधेश जागरण अभियान पुनः सुरु गरिएको जानकारी दिए । अभियान नवलपरासीबाट सुरु गर्नुपर्ने भए पनि महिलाको प्रदेश सम्मेलनसँगै लुम्बिनीबाट अभियान सुरु गरिएको उनले जानकारी दिए ।
सो कार्यक्रममा माओवादी केन्द्रका नेताहरु नारायण काजी श्रेष्ठ, कृष्णबहादुर महरा, पूर्णकुमारी सुवेदी, अग्नीप्रसाद सापकोटालगायतको सहभागिता रहेको थियो ।
