काठमाडौं : प्रधानमन्त्री केपी शर्मा ओलीले उपप्रधान तथा अर्थमन्त्री बिष्णु पौडेल, मुख्य सल्लाहकार बिष्णु रिमालसहितको सरकारी टोली लिएर तराई–मधेस द्रुतमार्ग सडक आयोजनाका विभिन्न क्षेत्रको निरीक्षण गरेका छन् ।
नेपाली सेनाले निर्माण गरिरहेको सो सडकका विभिन्न भागको प्रधानमन्त्रीसहितको टोलीले आज स्थलगत निरीक्षण गरेका हुन । प्रधानमन्त्रीले निजगढ–काठमाडौंतर्फको लेनडाँडा सुरुङमार्गको लेनडाँडा इलाकामा निर्माणाधीन सुरुङ, जीतपुर खोला पुल तथा धोद्रे सुरुङको निकास क्षेत्रको निरीक्षण गरेका छन् ।
काठमाडौं–निजगढतर्फको धोद्रे सुरुङको पनि प्रधानमन्त्रीसहितको टोलीले निरीक्षण गरेका हुन । सो सुरुङको ब्रेक थ्रु भइसकेको छ । प्रधानमन्त्रीले धोद्रे इलाकामा निर्माणाधीन पुल तथा द्रुतमार्गका संरचनाहरूको पनि निरीक्षण गरेका थिए ।
प्रधानमन्त्रीका मुख्य सल्लाहकार रिमालका अनुसार प्रधानमन्त्री ओलीले फास्ट ट्रयाकमा भइरहेको ढिलाई र कामलाई तीब्रता दिएर समयभित्रै सम्पन्न गराउने चाहनासहित निरीक्षण गरेका हुन ।
