काठमाडौं : नेपाली कांग्रेसका नेता तथा पूर्वमन्त्री जितेन्द्र देव नेकपा एमालेमा प्रवेश गरेका छन् । उनी एमालेका पुराना नेता हुन ।
सोमबार पार्टी केन्द्रीय कार्यालय च्यासलमा आयोजित कार्यक्रममा देव लगायतका नेताहरू एमाले प्रवेश गरेका हुन । संविधान सभा सदस्य, पूर्वपर्यटन मन्त्री एवं राष्ट्रिय सभाका पूर्वसदस्य समेत रहेका देवलाई एमाले अध्यक्ष केपी शर्मा ओली लगायतका नेताहरूले एमालेमा स्वागत गरेका हुन ।
कार्यक्रममा वरिष्ठ उपाध्यक्ष ईश्वर पोखरेल, महासचिव शंकर पोखरेल, उपमहासचिव प्रदीप ज्ञवालीलगायतका नेताहरूको सहभागिता रहेको थियो । उनीहरूले देव लगायत पार्टी प्रवेश गर्ने नेताहरूलाई खादा र टीका लगाएर स्वागत गरेका थिए ।
एमालेबाट राजनीति सुरु गरेका देव एमाले पोलिटब्युरो सदस्यसम्म भएका थिए । बिचमा विजयकुमार गच्छदार नेतृत्वको मधेसी जनअधिकार फोरम लोकतान्त्रिक हुँदै उनी नेपाली कांग्रेसमा पुगेका थिए । देवले आत्मालोचना गर्दै पुरानै पार्टीमा फर्किएको बताए ।
देवसँगै लोकतान्त्रिक समाजवादी पार्टी (लोसपा) का वरिष्ठ उपाध्यक्ष अकबाल अहमद साह लगायतका नेताहरू पनि एमाले प्रवेश गरेका छन् ।
