नेपालगञ्ज : बाँकेका पत्रकार सिराज खानलाई भारतको कानपुरमा आयोजना गरिएको एक अन्तर्राष्ट्रिय कार्यक्रममा सम्मानित गरिएको छ ।
इन्डियन जर्नलिस्ट एशोसियसनको राष्ट्रिय समितिद्वारा भारत उत्तर प्रदेशको आर्थिक केन्द्र कानपुरमा सोमवार आयोजना गरिएको वर्तमान परिपेक्षमा पत्रकारहरुको भुमिका विषयक अन्तर्राष्ट्रिय सम्मेलनमा सम्मान गरिएको हो ।
इन्डियन जर्नलिस्ट एशोसियनका राष्ट्रिय अध्यक्ष सेराज अहमद कुरैशी, वरिष्ठ पत्रकारहरु जुबेर अहमद फारुकी, गिरिराज सिंह, डा रमेश बर्मा, अन्जनि निगम लगायतले पत्रकार खानलाई सम्मान गरेका हुन् ।
कार्यक्रमलाई सम्बोधन गर्ने अधिकांश वक्ताले लोकतन्त्रको रक्षाका लागि भारत र नेपालका पत्रकारको भुमिका सबैभन्दा अहम भएको जनाउँदै अहिले पनि सोहि कार्यमा लागिरहेको बताएका थिए ।
कार्यक्रममा एशोसियसनका राष्ट्रिय अध्यक्ष कुरैशिले एशोसियसनले यस्ता कार्यक्रमलाई निरन्तर गरिरहने बताए । सो अवसरमा भारतका दर्जनबढि वरिष्ठ पत्रकारहरुलाई विभिन्न सम्मान प्रदान गरिएको थियोे ।
सम्मेलनले पत्रकारहरुलाई सरकारले तलब सुविधा प्रदान गर्नुपर्ने र डिजिटल पत्रकारितालाई मान्यता दिनुपर्ने लगायत पत्रकारको सुरक्षा सम्बन्धि विभिन्न प्रस्ताव पनि पारित गरेको एशोसियसनको कानपुर युनिटका अध्यक्ष मुकिम कुरैशीले बताए ।
सो सम्मेलनमा भारत र नेपालका दुईसय बढी पत्रकारहरुको सहभागिता रहेको थियो ।
