आगरा (भारत) : उत्तर प्रदेशका उपमुख्यमन्त्री ब्रजेश पाठकले पत्रकारिता प्रजातन्त्रको चौथो स्तम्भ भएकोले सत्ता र पत्रकारिताका प्रतिष्ठितहरु मिलेर दुबै बीचको दूरी समाप्त गरेर प्रजातन्त्रलाई मजबुत बनाउनु पर्नेमा जोड दिएका छन् । उनले यस्तो गरे मात्र देश र प्रदेशको प्रगति सम्भव हुने बताए ।
प्रेस क्लब अफ आगरा र उत्तर प्रदेश जर्नालिस्ट एसोसिएशनको सहयोगमा बुधवार आगरामा आयोजित इण्डो–नेपाल–बंगलादेश मीडिया कांक्लेव –२०२३ मा उप मुख्यमन्त्री पाठकले भीडियो सन्देशको माध्यमबाट यस्तो बताएका हुन् ।
होटल क्लार्क शिराजमा आयोजित उक्त सम्मेलनमा भारत, नेपाल र बंगलादेशबाट ७० भन्दा बढी पत्रकारहरुको सहभागिता थियो । सामयिक परिदृश्यमा मीडियाका चुनौतियाहरु र समाधानका विषयमा सम्मेलन आयोजना गरिएको थियो ।
कार्यक्रमका प्रमुख अतिथि केन्द्रीय विधि एवं न्याय राज्यमन्त्री प्रो.एसपी सिंह बघेलले प्रतिस्पर्धा र टीआरपीको चक्करमा केही समाचारहरु अधुरो र तथ्यहीन प्रसारित, प्रकाशित गर्दा समाजमा गलत असर परिरहेको उल्लेख गरे ।
नेपालका पत्रकारहरुको स्वागत गर्दै उनले नेपालसँग हाम्रो रोटीबेटीको सम्बन्ध भएको बताए । उनले भाषा, संस्कृति, सभ्यता सबै नेपालसँग मिलेकोले हामी दुई भाई भएको उल्लेख गरे ।
