नेपालगञ्ज : नेपालगञ्जमा दादुरा देखा परेको छ । नेपालगञ्जको फुल्टेक्रामा एकै घरका चार जना बालबालिकामा दादुरा देखिएको हो । ५ देखि १२ वर्षभित्रका तीन बालिका र एक बालमा दादुरा पुष्टि भएको हो । त्यहाँ अरु १७ जना शंकास्पद रहेको स्वास्थ्य कार्यालय बाँकेका खोप सुपरभाइजर नरेश श्रेष्ठले बताए ।
लामो समयपछि नेपालगञ्जमा दादुरा देखिएपछि विश्व स्वास्थ्य संगठन, स्वास्थ्य कार्यालय बाँकेको टोली घटनास्थलमा खटिएर शंकास्पदहरुको खोजी गरिरहेका छन् ।
एउटा टोल, बस्तीमा ५ जनासम्म दादुराका विरामी देखापरेमा त्यसलाई महामारीको रुपमा लिने गरिन्छ । फुल्टेक्रामा एकै घरमा चार जनामा दादुरा देखिएकाले महामारीको रुपमा लिँदै स्वास्थ्यको टोली परिचालन भएका छन् ।
नेपाल सरकारले सन् २०२३ सम्ममा दादुरालाई निवारण गर्ने लक्ष्य लिएको थियो । यो भनेको १ हजारमा १ जना भन्दा कममा दादुरालाई झार्ने हो । दादुराको खोप नलगाएका या खोप पुरा नगरेका ब्यक्तिलाई दादुरा देखिने खोप सुपरभाइजर श्रेष्ठले बताए ।
