दाङ : दाङको घोराही तुलसीपुर सडकखण्डमा बसले ठक्कर दिँदा मोटरसाइकलमा सवार एक युवतीको मृत्यु भएको छ । मोटरसाइकल चालक घाइते भएका छन् ।
मृतक युवतीको परिचय नखुलेको जिल्ला प्रहरी कार्यालय दाङले जनाएको छ । मोटरसाइकल चालक दंगीशरण गाउँपालिका ७ का १७ वर्षीय क्रिश खड्का घाइते भएका हुन् ।
जिल्ला प्रहरी कार्यालय दाङका प्रवक्ता डीएसपी राजनकुमार गौतमका अनुसार घोराही उपमहानगरपालिका १६ सर्रामा तुलसीपुरबाट घोराही आउँदै गरेको रा १ ख २३७५ नम्बरको बसले विपरीत दिशातर्फ जाँदै गरेको रा २ प ५२५५ नम्बरको मोटरसाइकललाई ठक्कर दिएको हो ।
घाइते खड्काको उपचार राप्ती स्वास्थ विज्ञान प्रतिष्ठानमा भइरहेको छ । ठक्कर दिने बस र चालकलाई भने प्रहरीले नियन्त्रणमा लिएको प्रवक्ता गौतमले जानकारी दिए ।
