नेपालगञ्ज : आगामी बैशाख ३० गते सम्पन्न हुने स्थानीय तहको निर्वाचनमा बाँकेका दुई पालिकामा एकाघरका दुई दाजुभाई फरक–फरक राजनीतिक दलबाट मुख्य प्रतिश्पर्धी रहेका छन ।
नेपालगञ्ज उपमहानगरपालिका–१ मा एमालेबाट भाई प्रमोद रिजाल र दाजु बिनोद रिजालले काँग्रेसबाट वडा अध्यक्षका लागि फरक–फरक पार्टीबाट उम्मेदवारी दर्ता गराएका छन । भाई प्रमोद २०७४ मा निर्वाचित वडा अध्यक्ष हुन ।
उनी उपमहानगरपालिकाको प्रवक्ता समेत भएका थिए । वडाध्यक्ष हुनु अघि प्रमोद कानुन व्यवसायी संगै एमालेका युवा संघमा क्रियाशिल थिए । कांग्रेसबाट उम्मेदवार भएका विनोदले २०४६ देखि विद्यार्थी राजनीति सुरु गरेका हाल तरुण दल बाँकेको सचिव हुन ।
त्यस्तै कोहलपुर नगरपालिकामा पनि दुई सहोदर दाजुभाइबीच प्रतिस्पर्धा हुने भएको छ । नगरपालिकाको वडा नं ३ मा भाइ माधव रिजाल र दाजु तारकेश्वर रिजालबीच प्रतिस्पर्धा हुने भएको हो ।
माधव २०७४ सालमा निर्वाचित वडाध्यक्ष हुन् भने दाजु तारकेश्वर त्यतिबेला पनि ६५ मतले पराजित भएका थिए । माधव एमालेबाट तथा तारकेश्वर नेकपा (माओवादी) केन्द्र)बाट वडाध्यक्षका लागि भिड्दै छन् । जिल्लाको आठ स्थानीय तहमा ४ सय २१ पदका लागि दुई हजार ३ सय २९ जनाको उम्मेदवारी परेको छ ।
