कोहलपुर : बाँकेको कोहलपुर चौराहमा ड्युटीमा खटिएकी प्रहरी जवानको ट्रक पल्टिएर च्यापिँदा मृत्यु भएको छ । ईलाका प्रहरी कार्यालय कोहलपुरमा कार्यरत प्रहरी जवान कविता बुढाक्षेत्रीको ट्रक पल्टिदा च्यापिएर मृत्यु भएको हो ।
बर्दियाको ठाकुरबाबा नगरपालिका ७ घर भएकी ३६ वर्षीया बुढाक्षेत्रीको चौराहामा आइतबार राति १० बजे तीव्र गतिमा आएको ट्रक अनियन्त्रित भई दुर्घटना हुँदा मृत्यु भएको थियो ।
ना ३ ख ६४३६ नम्बरको ट्रक पल्टिँला चौराहाको पश्चिम क्षेत्रमा ड्युटीमा खटिएकी प्रहरी जवानको मृत्यु भएको जिल्ला ट्राफिक प्रहरी कार्यालयका प्रमुख हिमालय शाहले जानकारी दिए ।
ट्रक सुरुमा दक्षिणतर्फ रहेको डिभाइडरमा ठोक्किएको थियो । ट्रक चालक बबई गाउँपालिका ६ दाङका लोकराज केसीले मदिरा सेवन गरेको प्रहरीले जनाएको छ । यसबारे थप अनुसन्धान भइरहेको कोहलपुर प्रहरीले जनाएको छ ।
