नेपालगञ्ज : नेपाल एकीकरणका अभियन्ता पृथ्वीनारायण शाहको योगदान स्मरण गर्दै मंगलवार पृथ्वी जयन्ती मनाइँदै छ । ३०० औं पृथ्वी जयन्तीका अवसरमा देशभर विभिन्न कार्यक्रम गरिंदैछ ।
गोर्खाली राजा नरभूपाल शाह र रानी कौशल्यावतीका जेठा छोराका रूपमा वि.सं. १७७९ पुस २७ गते जन्मेका शाहले बाइसे–चौबीसे राज्यमा छरिएर रहेका राज्यहरुलाई एकत्रित गरेर आधुनिक नेपाल निर्माण गरेका थिए । भौगोलिक रूपमा नेपाल एकीकरण गरेकाले शाहलाई राष्ट्र निर्माताको उपमा समेत दिने गरिएको छ ।
बर्दियाको गुलरियामा निर्माण गरिएको पृथ्वी नारायण शाहको पूर्ण कदको पित्तलको शालिकको मंगलवार अनावरण गरिएको छ । प्रदेश नम्वर २ का पूर्व प्रदेश प्रमुख राजेश अहिरले शालिकको अनावरण गरेको शालिक निर्माण समितिका सचिव कमलराज पौडेलले बताए ।
बर्दिया क्षेत्र नम्वर १ का संघीय सांसद संजयकुमार गौतमको पूर्वाधार विकास कोष मार्फत शालिक निर्माणका लागि १० लाख रकमबाट शालिक निर्माण गरिएको पौडेलले बताए । पृथ्वीजयन्तीको अवसरमा नेपालगञ्जको वीरेन्द्र चोकमा पनि कार्यक्रम गरिएको छ । यस्तै नेपालगञ्ज उपमहानगरपालिका–४ ले मंगलवार सार्वजनिक विदा समेत दिएको छ ।
