नेपालगञ्ज : नेपाली कांग्रेस बाँकेको १४ औं महाधिवेशन अन्तर्गतको कार्यक्रम अनुसार वडा अधिवेशनमा करिव ६० प्रतिशत वडामा सर्वसम्मत भएको निर्वाचन समितिले जनाएको छ ।
निर्वाचन कार्यक्रम अनुसार शनिबार बाँकेका ८१ वटै वडामा सुरु भएको मध्ये करिव ६० प्रतिशत वडामा सर्बसम्मत भएको प्रमुख निर्वाचन अधिकृत रेवती रमण भट्टराइले जानकारी दिए । उनले निर्वाचन स्थलमा खटिएका मतदान अधिकृत र सहायक मतदान अधिकृतले औपचारिक रुपमा निर्वाचनको परिणाम नपठाए पनि एक मात्र उम्मेदवार भएकोले अधिकांश वडामा सर्बसम्मत भएको बताए ।
प्रमुख निर्वाचन अधिकृत भट्टराईका अनुसार बाँकेका ८ वटै स्थानीय तहका ८१ वटा वडामा १ जना मतदान अधिकृत र २ जना सहायक मतदान अधिकृत परिचालित भएका छन । आइतबार अधिकांश वडामा क्षेत्रीय प्रतिनिधिका लागि मात्र निर्वाचन हुने देखिएको छ ।
कात्तिक २८ गते आइतबार बिहान ९ बजेदेखि दिउँसो ४ बजेसम्म मतदान र मतदान पश्चात गणना तथा मत परिणाम घोषणा गरिने कार्यक्रम तय भएको छ । बाँकेको वडादेखि जिल्ला तहसम्मको संशोधित निर्वाचन तालिका अनुसार कात्तिक २८ गते वडा, मंसिर १ गते पालिका, मंसिर ४ गते प्रदेश सभा, मंसिर ७ गते क्षेत्र र मंसिर ११ गते जिल्लाको निर्वाचन हुनेछ ।
