नेपालगञ्ज : कोरोना संक्रमणको कारण दुई वर्षदेखि रोकिएको नेपाल–भारत मैत्री बससेवा आईतवारबाट पुन सञ्चालनमा आएको छ । कोरोना संक्रमणको कहर क्रमश घट्दै गएकोले नेपालगञ्जबाट भारतको राजधानी दिल्ली, उत्तर प्रदेशको राजधानी लखनउ र हरिद्वारका लागि नेपाल–भारत यात्रुमैत्री बससेवा आइतवारदेखि पुनः शुरु हुने भएको हो ।
भेरी यातायात प्रालिले नेपाली नम्बरको बस नेपालगञ्जबाट दिल्ली, लखनउ र हरिद्वारका लागि पुनः सञ्चालनमा ल्याउने तयारी गरेको प्रालिका अध्यक्ष राजेन्द्र गिरिले जनाकारी दिए । उनले कोरोना महामारीको कारणले गर्दा दुईवर्ष अघि सञ्चालनमा ल्याईएको सो बस सेवा बन्द गर्नु पर्दा त्यसबाट व्यवसायीलाई ठूलो नोक्सानी भएको बताए । उनले यसबीचमा टुर्स ट्राभल्सका नाममा टिकट काटेर नेपालीलाई अलपत्र पार्ने गिरोहका कारण भारतका विभिन्न शहर जाने यात्रीलाई मैत्री बसको यात्राले भरपर्दो र सुरक्षित सेवा दिने दाबी गरे ।
कोरोना संक्रमण घट्दै गएर अवस्था सामान्य बन्दै गएपछि फेरी सो बस सेवा शुरु गर्न लागिएको उनले बताए । अध्यक्ष गिरीका अनुसार लखनउका लागि हरेक दिन ८ बजे नेपालगञ्जबाट बस छुट्ने र लखनउबाट नेपालगञ्जका लागि राती ८ बजे छुट्ने छ । यसैगरि दिल्लीका लागि साँझ ५ बजे नेपालगञ्जबाट छुट्ने र दिल्लीबाट नेपालगञ्जका लागि पनि साँझ ५ बजे नै बस छुट्ने छ ।
यस्तै हरिद्वारका लागि नेपालगञ्जबाट राती ८ बजे बस छुट्ने र हरिद्धारबाट नेपालगञ्जका लागि अपरान्ह ४ बजे बस छुट्ने छ । लामो समयदेखि रोकिएको सो बस सेवा फेरी सुचार भएपछि दिल्ली, लखनउ र हरिद्वार जाने नेपालीलाई सहज हुने भएको छ ।
रुपैडिहाबाट हरिद्वार र दिल्ली जाने नेपालीहरु धेरै ठाउँमा ठगिने गरेकोले पनि नेपाल भारत मैत्री बस सेवाबाट ती ठाउँको यात्रा गर्नेलाई सुरक्षित र सहज यात्रा गर्ने अवसर समेत मिल्ने भेरी यातायात प्रालिले जनाएको छ । रोकिएको मैत्री बस सेवा शुरु भएपछि दुबै देशविच व्यापार व्यवसाय समेत बढ्ने नेपालगञ्ज उद्योग वाणिज्य संघका अध्यक्ष अब्दुल वाहीद मन्सुरीले बताए ।
उनले–‘ कोरोनाले थलिएको यतायात व्यवसायलाई मैत्रीबस पुनः सञ्चालन हुँदा व्यवसायमा ठूलो प्रभाव पार्ने छ ।’ उनले यस सेवाले रुग्ण अवस्थामा रहेको व्यावसाय पुन सञ्चालन हुने र गतिलिने विश्वास व्यक्त गरे । न्युज कारखानाबाट
