नेपालगञ्ज : नेपालगञ्जमा शनिवार हिन्दुवादीहरुले मोटरसाइकल र्यालीसहित शक्ति प्रदर्शन गरेका छन् । राष्ट्रिय प्रजातन्त्र पार्टीको अगुवाइमा हिन्दुवादीहरुले हिन्दु राष्ट्र र राजसंस्था पुनःस्थापनाको माग राख्दै नेपालगञ्जमा शक्ति प्रदर्शन गरेका हुन् ।
बागेश्वरी मन्दिर अगाडीबाट शुरु भई धम्बोझी चोकमा समापन भएको र्यालीमा हजारौंको संख्याका मोटरसाइकलसहित आएका हिन्दुवादीहरुले नेपाललाई धर्मसापेक्ष हिन्दु राष्ट्र घोषणा, राजसंस्था पुनःस्थापना, संघीयता खारेजीको माग राख्दै शक्ति प्रदर्शन गरेका हुन् ।
शक्ति प्रदर्शनको नेतृत्व राप्रपाका केन्द्रीय सदस्य ऋषिराज देवकोटाले सम्हालेका थिए । राजसंस्थाको पुनःस्थापनाको माग राख्दै गरिएको शक्ति प्रदर्शनमा मोटरसाइकलमा मात्रै नभई गाडी, अटो, रिक्सा र साइकलमा समेत हिन्दुबादीहरु आएका थिए ।
