नेपालगञ्ज : बाँकेमा कोरोना संक्रमणबाट एक जनप्रतिनिधि महिलाको मृत्यु भएको छ । जिल्ला कोभिड–१९ संकट व्यवस्थापन केन्द्र बाँकेले दिएको जानकारी अनुसार मृतक महिलालाई गत कात्तिक ४ गते संक्रमण पुष्टि भई उसैदिन भेरी अस्पतालमा भर्ना भएकी थिईन ।
नेपालगञ्ज उपमहानगर वडानं. २ की ६७ वर्षिया महिलाको उपचारको क्रममा सोमबार बिहान १० ः ३० बजे मृत्यु भएको जिल्ला कोरोना फोकल पर्शन नरेश श्रेष्ठले जानकारी दिए । उनी सोही वडाबाट निर्बाचित वडा सदस्य हुन ।
फोकलपर्शन श्रेष्ठका अनुसार मृतकलाई रोगको प्रकृति अनुसारको आवश्यक पर्ने सबै उपचार गरिए पनि स्वास्थ्यमा सुधार नआई आज बिहान साढे १० बजे उपचारको क्रममा मृत्यु भएको हो ।
कोरोना संक्रमणबाट बाँकेका दुई अस्पतालमा पछिल्लो ४८ घण्टाको अवधिमा ७ जनाको मृत्यु भएको छ । भेरी अस्पताल नेपालगञ्जमा ३ र नेपालगञ्ज मेडिकल कलेज शिक्षण अस्पताल कोहलपुरमा ४ गरी ४८ घण्टाको अवधिमा ७ जना संक्रमितको मृत्यु भएको हो ।
मृत्यु हुनेमा बाँके र दाङका तीन–तीन र कैलालीका एक जना रहेको जिल्ला कोभिड–१९ संकट व्यवस्थापन केन्द्रले जनाएको छ । यो संगै कोरना संक्रमणका कारण ज्यान गुमाउनेमा ३४ जना पुगेका छन् भने बाहिर जिल्लाबाट उपचार गराउन आएका २१ जनाले कोरोना संक्रमणका कारण ज्यान गुमाएका छन् । फोटो : जिल्ला कोभिड–१९ संकट व्यवस्थापन केन्द्र बाँके
