सदरलाइनडटकम,
कोहलपुर (बाँके) : नेपालगञ्ज मेडिकल कलेज शिक्षण अस्पताल, कोहलपुरमा सोमबार साँझ मृत्यु भएकी महिलामा कोरोना पुष्टि भएको जानकारी प्राप्त भएको छ । दायाँ फोक्सोमा समस्या देखिएपछि गत ३० जेष्ठमा अस्पताल भर्ना भएकी बाँके, बैजनाथ गाउँपालिका–६ सम्झनाकी ४६ वर्षीया महिलामा मृत्युपछि कोरोना पुष्टि भएको हो ।
उनको सोमवार दिउसो कोरोना परीक्षणको लागि स्वाब संकलन गरी भेरी अस्पतालको प्रयोगशालामा पठाइएको स्वास्थ्य कार्यालय बाँकेका फोकलपर्शन नरेश श्रेष्ठले जानकारी दिए । अस्पताल निकट स्रोतका अनुसार उनको मृत्यु सोमबार बेलुकी साढे ६ बजे भएको र कोरोनाको रिपोर्ट मंगलवार अबेर आएको हो ।
स्वास्थ्य कार्यालय बाँकेका फोकलपर्शन श्रेष्ठले मृतकको शव नेपालगञ्ज मेडिकल कलेज शिक्षण अस्पताल, कोहलपुरको शव गृहमा रहेको र अन्तिम संस्कार तथा शवको व्यवस्थापन कोबिड–१९ को निर्देशिका बमोजिम गरिने तयारी भएको बताए ।
दायाँ फोक्सामा समस्या देखिएपछि महिला अस्पताल भर्ना भएको अस्पताल स्रोतले जानकारी दिएको छ । अस्पतालले मंगलबार राती सवा ११ बजेसम्म कुनै आधिकारीक धारणा भने सार्वजनिक गरेको छैन ।
यसअघि बाँकेको नरैनापुरमा समेत २५ वर्षिय मृतक युवामा समेत कोरोना पुष्टि भएको थियो । यो सँगै बाँकेमा कोरोना संक्रमणका कारण मृत्यु हुनेको संख्या दुई जना पुगिसकेको छ ।
