नेपालगञ्ज : बाँकेको डुडुवास्थित जयेन्दु बाल सुधार गृहबाट भागेका चार जना बालबन्दी अझै फेला पर्न सकेका छैन । गत बिहीबार राति बालबन्दीको बीचमा झडप हुँदा भागेकामध्ये चार जना अझै सम्पर्कबाहिर रहेको बाँकेका प्रहरी प्रवक्ता डिएसपी नारायण डाँगीले जानकारी दिए ।
उनीहरुको तीब्र रुपमा खोजतलास भइरहेको उनले बताए । डिएसपी डाँगीका अनुसार भागेका बालबन्दीलाई खोज्न प्रहरी परिचालन गरिएको छ । बालबन्दी जान सक्ने ठाउँमा निगरानी बढाइएको छ । बालसुधार गृह सीमा नाका नजिक भएकाले भारततिर गएको हुन सक्ने आशंका गरिएको छ ।
बाल सुधार गृहका अन्य केहीलाई सुधार गृह भित्रै अलग राखेर सोधपुछ तथा अनुसन्धान जारी राखिएको छ । झडपमा अगुवाई गरेकाहरुलाई छानेर अलग राखिएको हो ।
जसमा राती भागेर पुनः पक्राउ परेका २५ जना पनि रहेको बताइएको छ । दुई सय ५४ जना बालबन्दी रहेको सुधार गृहमा यसपालीको झडपमा एक जनाको मृत्यु भएको छ भने १० जना घाइते भएका छन् ।
