दाङ : दाङको मा.वि.तुलसीपुर सेन्टरले मंगलबारदेखि ‘एटीएम मेसिन’ सञ्चालनमा ल्याएको छ । मंगलबारदेखि विद्यालय हाताभित्रै एनआईसी एसिया बैंकको सहकार्यमा ‘एटीएम मेसिन’ सञ्चालनमा ल्याएको हो ।
विद्यार्थी, शिक्षक, अभिभावकहरुलाई सहज तरिकाले बैंकिङ सेवा प्रभाव गर्नका लागि विद्यालय हाताभित्र एनआईसि एसिया बैंकको सहजिकरणमा एटीएम मेसिन सञ्चालनमा ल्याएको विद्यालयका प्रधानाध्यापक भागवत पौडेलले जानकारी दिए । साथै विद्यालय क्षेत्र आसपासका सम्पूर्ण नागरिकलाई पनि यस मेसिनल बैंकिङ कारोबारमा सहजता प्रदान गर्ने बताए ।
बार्षिक कार्ययोजना अनुसार एटिएम मेसिन विद्यालय हाताभित्र सञ्चालन गर्ने उद्देश्य रहेकोमा आज त्यो पूरा भएको जिकिर गरे । त्यस्तै उनले आगामी वर्षमा विद्यालय हाताभित्रै बैंकको क्यास काउन्टर पनि सञ्चालनमा ल्याउने कार्ययोजना रहेको बताए । विद्यालय हाताभित्र एटीएम मेसिन सञ्चालनमा ल्याउने जिल्लामै पहिलो विद्यालय पनि मावि सेन्टर बनेको छ ।
त्यस्तै एनआईसी एसिया बैंक तुलसीपुर शाखाका प्रमुख राजिव वलीले विद्यालय र विद्यालय आसपासका नागरिकलाई लक्षित गरेर विद्यालय हाताभित्र एटिएम मेसिन जडान गरेको बताए ।
विद्यालय व्यवस्थापन समितिका अध्यक्ष लेखतराम पौडलको अध्यक्षतामा भएको कार्यक्रमको उदघाटन विद्यालयका संस्थापक अध्यक्ष नारायण प्रसाद रजौरेले रिबन काटेर गरेका थिए ।
