बर्दिया : कांग्रेस सांसद सञ्जयकुमार गौतमको अनशन छैटौं दिनमा प्रवेश गरेको छ । तत्काल पुल निर्माणलगायतका माग गर्दै अनशनमा बसेका कांग्रेस सांसद गौतमको स्वास्थ्य अवस्थामा सामान्य असर देखिन थालेको चिकित्सकले बताएका छन् ।
बर्दिया अस्पतालका मेडिकल सुपरिटेन्डेन्ट डाक्टर सुभाष पाण्डेयका अनुसार गौतमको शरीरमा पानीको मात्रा घट्न थालेको छ । स्वास्थ अवस्था नाजुक बन्दै गएपछि प्रमुख जिल्ला अधिकारी नारायण रिसाल, प्रहरी उपरीक्षक सुदीप शाहीलगायत चिकित्सकको टोली अनशनस्थल पुगेका छन् । सांसद गौतमले माग पूरा नभएसम्म स्लाइन पानी नचढाउने अडानमा रहेका छन् ।
![](https://sadarline.com/wp-content/uploads/2023/06/355735841_163168713323414_6806641009584846467_n.jpg)
![](https://sadarline.com/wp-content/uploads/2023/10/Ntc-add-1-.jpg)
बबई नदीको जब्दीघाट आसपासमा नयाँ पुल निर्माण,गुलरिया र भारतको मुर्तिहा नाका सञ्चालन, नदी नियन्त्रणका लागि पर्याप्त बजेट,बबई सिँचाइमा बजेट कटौती नगर्न, भुरीगाउँ—तेलपानी सडक निर्माणलगायत १५ बुँदे माग राख्दै वैशाख ३० गतेदेखि सांसद गौतम अनशन बसेका हुन् । उनका मागप्रति राज्य बेखबर भएको भन्दै सत्याग्रह अभियानमा ऐक्यबद्धता जनाउँदै दिनहुँ दर्जन बढीले २४ घण्टे रिले अनशन पनि जारी राखेका छन् ।
यसैबीच गत असोज २० गते आएको बाढीले बगाएको स्पान भत्काउन सुरु गरिएको छ । उक्त स्पान नहटाउँदा वर्षा याममा बाढीले जब्दीघाट आसपासका गाउँ डुबानमा पर्ने जोखिम थियो । गुलरिया नगरपालिकाका प्रमुख मुक्तिनाथ यादवले गौतमले उठाएका जायज माग तत्काल सम्बोधन गर्न सरकारसँग माग गरेका छन् । सांसद गौतमको शारीरिक अवस्था जटिल हुँदै गएकोले तत्काल माग सम्बोधन हुनुपर्ने उनले बताए ।