नेपालगञ्ज : विभिन्न समयमा चर्चामा आइरहने राँगा तस्करी राप्ती सोनारीमा रोकिएको छैन । बिहीबार मध्य राती राप्ती सोनारी ४ लटनिया हुँदै अगैयामा लोड हुँदै गरेको १२ वटा राँगा प्रहरीले नियन्त्रणमा लिएको छ ।
कागज पत्र नै पुरा नगरि मासु प्रयोजनका लागि काठमाण्डौ लैजान लागेको १२ वटा राँगा प्रहरी चौकी अगैयाले नियन्त्रणमा लिएको हो । प्रहरी चौकीका इन्चार्ज प्रहरी सहायक निरिक्षक राम बहादुर चन्दले राँगासहित ५ जना तस्करहरुलाई नियन्त्रणमा लिएको जानकारी दिए ।
यस बिषयमा रातीनै बाँकेका प्रहरी प्रमुख प्रहरी उपरीक्षक श्याम कृष्ण अधिकारीले तत्काल नियन्त्रणमा लिएर भन्सार पठाउन अगैया र धामपुर प्रहरीलाई निर्देशन दिएका छन् । यसअघि पनि प्रहरीले ४ वटा राँगा आवश्यक कारवाहीका लागि भन्सार कार्यालयमा बुझाएको थियो ।
तस्करले राप्तीसोनारी र नरैनापुर गाउँपालिकाको विभिन्न वडाहरुमा अनुमती पत्र समेत बनाएको पाइएको छ । तस्करले राप्तीसोनारीको वडा न. ३ को कार्यालय, वडा न. ४ को कार्यालय र नरैनापुरको वडा न. २ को कार्यालयबाट अनुमती पत्रसमेत बनाएको कागज देखाएको छ । प्रहरीका अनुसार राँगाको भेटनरी भने नगरेको पाइएको छ ।
